DANBORRADA. Urtea hasi berria, danborrada donostiarra da hain segur munduko euskaldunen egutegian lehenik heldu den besta giroko elgarretaratzea. Ez dute batere leku guzietan ospatzen, baina beste batzuetan tradizio zinez errotu eta maitatua da, hala nola Argentinan hainbat lekutan, Necocheako Euskal Etxea buru; Mexikon, hiriburuko Euskal Etxean; Estatu Batuetan, aurten New Yorken ospatuko dute; Espainian, Madrilen eta Valladolid-en, konparazio; eta Txinan, Shangaiko Euskal Etxean... Baina gehiago dira urtarrilaren 20a hurbiltzen joan ahala heien danborradak iragarriko dituzten Diasporako elkarteak. Aurten, San Sebastian bezpera astelehena delarik, gehienek aitzineko larunbatera, 17ra, ekarriko dute, baina ez denek, Madrilgo Euskal Etxeak, adibidez, helduen danborrada bezperan bertan egingo baitu, eta haurrena ondoko igande goizean; New Yorkekoek ere 19an iragarri dute...

NABO eta FEVA. Oroitu, NABO Estatu Batuetako euskal elkarteen federazioa dela; eta FEVA, Argentinakoa. Urtarril huntan bi federazioak lankide arituko dira Argentinako San Nicolaseko Euskal Etxean, euskara irakasleak trebatzea helburu duen “Euskara Munduan” programako barnetegia Buenos Aires probintziako herri hortan eginen baita. Izan ere Etxepare Institutua sustatzaile, barnetegia urtarrilaren 17tik 24ra egingo da San Nicolasen (eta segidan, 24 eta 25ean, leku berean trebakuntza pedagogiko saila). Egin ere, Estatu Batuetako bi irakasle gonbidaturekin: Mikaela Goikoetxea (Wyoming) eta Madalen Bieter (Boise), NABOko euskara koordinatzaileak. Euskara irakasleak trebatzen Argentina da Diasporan buru den herrialdea, eta bi gazte iparramerikarrak zuzenean ezagutu nahi dute Argentinan egiten dutena, antzeko zerbait abiarazteko Estatu Batuetan. Ignacio Alustiza (Necochea) eta Rocio Basterra (Viedma) izango dira San Nicolaseko barnetegiko irakasle argentinarrak, Gabriela Mendia (FEVA) eta Kinku Zinkunegi (Etxepare) koordinatzaile.

CHINO eta VILLA MARIA. Urteko lehenengo artikulu huntan propio aipatu nahi ditugu Estatu Batuetako eta Argentinako urte berri huntako bi hitzordu nagusiak. Lehena, udan, Chinon eginen da, aurten 80 urte beteko dituen “Southern California Eskualdun Cluba” antolatzaile, Klubaren piknika eta NABOren Biltzar Nagusia bateginik. Eta urri-azaroan, Argentinan, eta hemen ere 1946 urte berean sortua, Villa Mariako Euzko Etxeak 2026ko “Semana Vasca” edo “Euskal Argentinar Aste Nazionala” ospatuko du. Zorionak bioi!