Han eta Hemen | 2026ko Urtarrilaren 29a
Euskarazko eta euskararen irakaskuntzaren bilana
dituen “Euskarazko eta euskararen irakaskuntza: 2004-2025 arteko bilakaera eta 2025eko eskola sartzearen bilana” deitu txostena berriki plazaratu du. Irakaskuntza publikoa, katolikoa eta Seaska dira aztertuak izan. Datu horiek eta dokumentua bera Hezkuntza Ministerioarekin berretsiak dira. Txostenaren hurbilagotik ikustera joan gira.
Euskarazko irakaskuntza eskaintzaren garapena
2004tik 2025erako tartean, 52 sail elebidun ideki dira irakaskuntza publikoan, horietan 44 idekitze gune berrietan eta 8 idekitze 1. mailan segipena segurtatzeko. Irakaskuntza elebiduna eskaintzen duten eskolen eta herriarteko eskola elkargoen (HEE) proportzioa %34tik %67ra emendatu da.
Irakaskuntza katolikoan berriz, ber urte tartean, 8 sail elebidun ideki dira eta irakaskuntza elebiduna eskaintzen duten eskola katolikoen proportzioa %50etik %67ra emendatu da.
Seaskari dagokionez, 13 ikastola ideki dira, 2025eko eskola sartzean 33 ikastola ziren.
Hiru sareak nahasiz, euskarazko irakaskuntza eskaintzen duten 1. mailako eskolen proportzioa %42tik %72ra emendatu da.
Kolegioaren kasuan berriz, 13 sail elebidun ideki dira hiru sareetako kolegioetan. Lizeoei dagokienez, irakaskuntza orokorreko lizeoetan 5 sail elebidun ideki dira, 15 lizeoetarik 12k irakaskuntza elebiduna proposatzen dute.
Kopururen bilakaera
Irakaskuntza elebiduneko kopuruak %87,6ez emendatu dira eta ikasle elebidunen proportzioa %18,5etik %67,4ra emendatu da.
Katolikoan, irakaskuntza elebiduneko kopuruak %62,8z emendatu dira eta ikasle elebidunen proportzioa %23,8tik %37,2ra emendatu da.
Seaskan, ikastolako murgiltze ereduan diren ikasleen kopurua %83,7z emendatu da.
Hiru sareak nahasturik, 21 urtez irakaskuntza elebiduneko murgiltze edo parekotasun ereduan diren ikasle kopuruak 5.930etik 10.709ra pasa dira, hots %80,6ko emendatzea. Ikasle elebidunen kopurua %24,5etik %43,8ra emendatu da. Murgiltze edo parekotasun ereduko ama-eskoletako ikasle elebidunen proportzioa %30,4tik %48,4ra emendatu da.
Kolegioaren kasuan, sailak nahasirik, %10,2tik %25,9ra igan da, eta lizeoan %6,6tik %14,4ra.
