Mus txapelketa Serresen

Urtarrilaren 31n, larunbat eguerditan abian da mus txapelketa, toki ezin ederragoan Serreseko kaperan. 32 ekipetan mugatua den lehiaketak, izen ematea beharrezkoa du, 10€ kide bakoitz, deituz 07-81-70-62-54ra edo serrestarrak@gmail.com helbidera mezua bidaliz. Sekulako giro gozoa muntatzen da holakoetan eta sari asko bada irabazteko, ahantzi gabe bertan jateko eta edatekoak segurtatuak direla. Euskaldunen karta-joko zahar hunek ukanen du iraupena, antolatzaile gazteeri esker.

Xukruta manaketa

Negu betean, urtero errepikatzen den ekitaldia, Spuc Kirolak antolaturik, ongi gozatzeko xukruta banatua izanen da otsailaren 7an, larunbat arratsaldean, 16:00etatik lekura, Inharria baserrian. Manaketa beharrezkoa da otsailaren 4a arte, ontzixka pertsona batendako 12€, deitu 07-71-07-71-59ra edo 06-09-11-36-78ra. Diru irabaziak Spuc Kirolak batasunaren alde, jakinik ontzixkak nola hornituak diren, ez zaizue damutuko.

Lotoa, Inharrian igandean

Otsailaren 1ean (14:30), Karrika eskolako Krakada elkarteak antolatzen du loto delakoa, Ibarrungo baserrian. Ateak zabalik izanen dira eguerdiko, jateko eta edatekoak bertan izanik, sari andana irabazteko, xehetasun guziak: krakada@gmail.com edo deituz 06-71-64-52-91ra.

Udako lanak

Udari begira, Senpereko herriak 18 urtez goitiko gazteei, udako lan baterako hautagaitza aurkeztea proposatzen die. Maiatzetik buruilera, zenbait lanpostu eskuragarri dira: zerbitzu teknikoa, uretako zentroa, hirizaintza, aisialdi zentroa eta nerabeen gunea, hilabeteko kontratuarekin. Dosierra ongi beterik itzuli beharko da otsailaren 20a aitzin, Herriko Etxea Karrika 75- 64310 Senpere helbidera, eskura daiteke www.saintpeesurnivelle.fr gunean edo Herriko Etxean bertan.

Jazz Manouche kontzertua

Otsailaren 5ean iragan beharra da jazz kontzertua Inharria baserrian, Senpereko Kultur eta Ondare elkartearen eskutik, jadanik leku guziak beteak dira. Jazz musikazaleek, bertze batekoa goaitatu beharko duzue.

Kayaklariak haserre

Egun hauetan, jaun merak hartu erabakiek hautsak harrotu ditu bereziki Spuc Kirolak elkartean dagon kayak sekzioko kide eta arduradunen inguruan. Hala nola, hauek erabiltzen duten lokala 43 urte hauetan, enpresa pribatu baten esku emana baitago 10 urterentzat. Hunen ondorioz, Herriko Etxe aitzineko manifestaldi batek bildu du jende andanaxka polita, hauetan sekzioko kide frango, oposizioko kide batzu ere, aintzirako auzokoak eta bertze. Sekzioaren bizitza bera kolokan ezarria da, jakinik galduko dutela zuten diru iturria pedaloen alokatzearekin. Herriko Etxeak bere aldetik ez du kayak sekzioa deuseztatzeko xederik, haatik herriko finantzen egoera larriarengatik, diru sarrera berriak beharrezkoak ditu. Alabainan, aintzirako bi kontzesioak diru iturri izanen dira. Halere aterabide bat bilatzen dute Spuc Kayak sekzioarekin elkartuz laster.

Hats-Berriren eskaera

Gaur oposizioan den taldeak galdegiten du lakuaren kudeaketako proiektua geldiaraztea herriko hauteskundeetaraino. Hauendako, sobera galdera erantzunik gabe gelditzen dira, beraien arrangura eta desadostasuna adierazi dute. Beharrezkoa zaiote holako erabaki garrantzitsua, martxoko bozen ondoko ekipak ongi aztertu dezan.