Behaskane Laphizketa herriak Elizetxea etxearentzat interesa agertzeko deialdia egin berri du. 422m²-ko euskal etxe ederra da, Herriko Etxeak erosia eta hiri zentroan idealki kokatua udaletxearen aitzinean. Duela berrogei urte, herriko taberna izan zen Elizetxea etxea, bertan herritarrak batuz. Gaur egun, isilik, proiektu berri baten beha dago. Herriko Etxeak sinesten du: eraikin hau herriaren bihotz taupada bihur daiteke berriz. Etxea bi solairutan hedatzen da: beheko solairua 247m²-koa da, eta han dira bizitokia, eranskinak, ogi-labea, sotoa eta bihitegia. Goiko solairua 175m²-koa da, lau logela eta bainugela batekin. Frontoinaren, elizaren eta Herriko Etxearen artean kokatua izanik leku estrategikoan da, eta horrek igarobide eta elkargune natural bilakarazten du. Ostatu, jatetxe, ostatatze, besta-gela, tokiko produktuen saltokia, herritarrendako zerbitzuak, kultur gunea… ideia guziak ongietorriak dira, bideragarriak eta herriaren nortasunari lotuak badira. Herriak hainbat irizpide behatuko ditu: proiektuaren sendotasun ekonomikoa, ikuspegi ekologikoa, tokiko ekoizle eta eragileekin dituen loturak, eta batez ere proiektuaren eramaileek herrian luzaz plantatzeko duten borondatea. Donejakue bidearen hurbiltasunak eta eskualdean hedatzen ari den turismo motak aukera handiak eskaintzen ditu turismoari eta zerbitzuei loturiko proiektuentzat. Antolaketa juridikoa malgua izanen da: alokairu komertziala, alokairu enfiteotikoa, okupazio hitzarmena… etorkizuneko kudeatzailearen instalazioa errazteko. Proiektu hunen gibelean talde bat bada. Herriko Etxearen buru hautatua izan den Emmanuel Recaldek, etorkizunari buruz itzulia den ikuspegia ematen dio bere taldeari. Bere kontseilariekin batera herri erdigunearen biziberritzea lehentasun nagusitzat dute.

Nola eman hautagaitza? Gunearen bisitak apirilaren 13tik 24ra baizik ez dira eginen. Interesatuak diren hautagaiek Herriko Etxearen webgunearen bidez izena eman behar dute: https://behasque-lapiste.fr. Hautagaitza dosier osoak e-mailez igorri beharko dira helbide huntara: contact@mairiebehasquelapiste.fr, maiatzaren 20a aitzin. Hautagaitza dosierra eta araudia zuzenean webgunean deskargagarri dira. Argibide gehiagorentzat, Herriko Etxearekin harremanetan sar daiteke 05-59-65-80-27 zenbakira deituz, ohiko idekitze orenetan (astelehena 13:30-18:00, osteguna 9:00-12:00/13:30-18:00, ostirala 15:00-18:30).