Herriko kontseilu berria

Berriki iragan da kontseilu berriaren bilkura. Huna zonbait urtez herriko gorabeherak kudeatuko dituztenen izenak:

Auzapeza: Isabelle Pargade

Axuantak: Jérome Larrieu, Marion Chomel, Emile Diratchette, Christine Lavigne, Sébastien Duritzague, Annabelle Vergez, Bixente Etchegaray, Maguy Bassagaisteguy.

Beste kontseilariak: Véronique Broussaingaray, Vincent Errotabehere, Laetitia Nortier, Ludovic Loisel, Sylvie Etchart, Jean Marie Goutenegre, Maite Incaby Etcheverry, Gilles Pedouan, Julie Arranno, Patrice Robert, Vaea Chemberro, Lenaïck Dinard, Louise Lafferrairie, Martial Haranger, Bénédicte Larre, Michel Ospital, Anais Funosas, Sébastien Bidart, Laure Harxubehere.

Azken lauak Herritarrekin zerrendaren izenean hautatuak izan dira.

Hara hautuak eginak dira, orain lanean hasteko edo segitzeko ordua da.

Minhotz kartierreko azken berriak

Minhotz auzoaldeko Minhoztarrak elkarteak bere ohiko biltzar nagusia egin zuen joan den otsailaren 8an. Karia horretara, joan den urteko gertakarien eta konduen bilduma egina izan zen eta urte hontako deliberamendu nagusiak hartuak izan ziren. Bilkuraren ondotik, Hazparneko Kaskarotei batzarri egina izan zitzaien usaiako giro alaitsuan.

Joan den larunbatean, biltzar nagusi hortan hartua izan zen erabakiari jarraikiz, hamar bat auzokide bildu dira Minhotz auzoa zeharkatzen duen departamenduko errebidearen eta Golarteneko bidearen bazterrak garbitzeko. Aurten ere, zikinkeria andana bildua izan da, froga jende batzuek ezaxolakeria handienean autotik anitz gauza aise botatzen dituztela. Bildu ondarkinen parte bat, bereizi ondoren auzoan diren zikinontzi berezietan emanak izan dira, gaineratikoa Beskoitzeko zikindegira eramana. Bestalde, Ustubilia behere aldetik D21E departamenduko errebidera doan xendara ederra berriz ere osoki txukundua izan da. Oinez eta zapeta on batzuekin, bidexka hori segurtasun handienean balia daiteke. Egin auzolanaz pozik, parte hartu duten gehienek bazkari partekatu baten inguruan bildu dira Noelia eta Antonioren etxean.

Ezkia ikastola

Urte guziz bezala ikastolako haurrek ikusgarria prestatua dute etxekoentzat eta lagunentzat. Hau Mendeala gelan iraganen da apirilaren 3an ostiralez (17:00).

Haurren ikusgarriaren ondotik jateko eta edatekoa izanen da goxoan kalakan artzeko.

Elgar Oinka

Hau da Hazparneko dantzari taldeetarik bat. Heldu den larunbatean apirilaren 4an (19:00), ikusgarria antolatua du Mendeala gelan. Dantzariak ikusi eta taloak jaten ahalko dira tokian berean trago bat edanez.

“Délices de l'Ursuia”

Urtsu Mendi Urkoiko elkarteak aurten ere egun berezia proposatzen du apirilaren 5ean, Urtsuian lasterka edo ibili nahi dutenentzat. Ibilaldiaren abiatzea 7:00etarik 9:00ak arte iraganen da, kurtsarentzat bi aukera daude: 22km egiteko abiatzea (9:00), 12km egiteko aldiz (10:00). Kurtsentzat izen emaiteak bukatuak dira.

Hor ere jateko eta edateko moldea emana da nahi duenarentzat.