Bestak

Larunbat arratseko kontzertuan izan da jende, 2.000 sarrera saldu dira. Igandeko eguna biziki interesgarria izan da: goizean meza nagusia Hazparneko klikarekin, arratsaldean berriz, desfilea zigantekin eta auto mozorrotuekin. Ahate joko eta dantza ederrak ere izan dira.

Luzeko pilota partidak:

• Astelehenean, Pelletrat pilotariaren omenaldia, Uztaritze bat 7 eta Uztaritze bi 5.
• Asteartean, Pantxo Olazagaztiren omenaldia, Noizbait 8 eta Spuc 5. Arratsaldean joko garbi partida izan zen, Jean Michel Jauregiren omenaldia, Etchegaray, Irubetagaray eta Içiaga 40 eta Jaureguiberry, Petain eta Suzanne 35.

Asteazken goizean trinketean jende anitz bildu da eta arratsaldean bertsuak izan dira, txarangak ongi animaturik. Bestak bukatzeko su-ziri ederrak eta Joselu Anaiak taldearekin dantzaldia. Bestak bukatu dire, ustez alegrantzian.

Adinekoen ateraldia

Urte guziz bezala, herriko kontseiluak antolatu du erretretatuen ateraldia. Urriaren 7an, asteazkenez, abiatuko da igerilekuko aparkalekutik (8:00), gosaria Izpegiko lepoko gaineko bentan egiteko. Gero, Ortzaizeko Arnabar bisitatu eta bazkaria Arrosako Kattina jatetxean eginen da. Bueltan, herriko edantegian azken tragoa hartuko da, bestetako gazteriak oparitua. Izen emateak urriaren 1a aitzin egin behar dira Herriko Etxera deituz 05-59-54-20-28. Zuen bila etortzeko norbait behar baduzue izen ematean egin galdera. Etorri ahal duzuen guziak egun goxo baten pasatzerat, denak elgarrekin.

Kirolak

Pilota – Neskak, palantxa: 3. mailan Urrutia Borda Edurne eta Arribillaga Audrey galtzaile 40-28 Denek Bat-en kontra. 4. mailan: Urreizti Leire eta Etxeberri Pacheco Laida irabazle 40-17 Arbonarrak-en kontra.

Gazteak: Endara Elorri-Barreneche eta Astigarraga Intza galtzaile 40-18 Airetik-en kontra. Funosas Marina eta Endara Joane galtzaile 40-10 Senpereren kontra.

Errugbia – Sarak galdu 15-45 Bidarten kontra, heldu den igandean jokatuko dute Urruñaren kontra.