Hegoaldean | 2026ko Irailaren 24a
Bernedoko udalekuak auzitegian
P-J.A
“Sarrea Euskal Udaleku Elkarteko” hamabortz begirale eta arduradun ikertuetarik hamar deitu ditu Gasteizko 3. Instrukzio Auzitegiak epailearen aitzinean lekukotasuna eman dezaten. Ertzaintzaren eta Gasteizko prokuradorearen ikerketen arabera, udalekuen arduradunei ustez sexu izaerazko delituak, erakuskeria eta derrigortze-delitua adingabeei jasanaraztea leporatzen zaie, Euskal Herriko zein Espainiako Erresumako anitz hedabideren arabera. Ikerketa penalaren oinarrian hogei familia inguru eta Espainiako “Abogados Cristianos” deritzan eskuin-muturreko taldea daude. Azken hauek, hiru urte arteko espetxe-zigorra galdegin dute auzipetu hamabortz gazteendako. Bertzalde, 140 inguru aita-amek begiraleekiko alderdia ere agertu zuten aitzinetik. Deitu hamar gaztetarik bederatzik galderen erantzuteari uko egin zioten, haien lehentasuna, oroz gain, adingabeen eskubideak eta intimitatea babestea zela bakarrik aipatuz. Erantzun duen bakarrak, bere abokatuari eman arrapostuan dio erakutsi dioten argazki batean ez duela bere bururik ikusten. Deliturik izan denik ukatzen dute eta diote Euskal Udalekuen elkarbizitza eta pedagogia ereduen aurkako eraso transfobiakoa baizik ez dela. Alta, salaketak dio begiraleek, bertzeak-bertze, 13 eta 15 urte arteko neskak eta mutilak ustez elgarrekin dutxatzera bortxatzen zituztela, begiraleak ere haiekin, omen, dutxatzen zirelarik. Begiraleek, aldiz, diote adingabeko nesken eta mutilen hautu askea zela elgarrekin dutxatzea… baita omen! 2026. uda huntan bergisan gertatu dela. Inork ez omen du inor bortxatu hortara. Alta, zenbait legegilek eta abokatuk, tartean Lidia Falcón feminista ezagunak dio, helduen ardurapean dauden zaintzapeko adingabeek ez dutela askatasunez hautatzen begiraleekin biluzik ibiltzea, aldiz, botere harreman asimetriko baten pairamena sufritzen dutela. Gipuzkoako Foru Aldundiko gizarte hezitzaile baten bidez, 2024. urtean Ertzaintzak lehen aldikoz “adingabeekiko balizko sexu erasoen berri” jakin eta hilabete gutxiren buruan, Aner Peritz Berria egunkariko zutabegileak, agirietan bederen Bernedoko Euskal Udalekuen arduradunetako batek, “Haurrak eta genero-esentzialismoa” artikulua (2025/02/06) atera zuen egunkarian. Peritz jaunaren hitzetan: “Zuen haurrak marikonizatu [homosexualiser] nahi ditugu (gure haurrik ez daukagu normalean) zuek, gurekin egin zenuten bezala, heterosexualiza ez ditzazuen. Ez zenuten guztiz lortu. Eta guk ere badauzkagu irakasle-tituluak.” Ondoko hilabeteotan ikusiren da auzibideak aitzina eginen duenez. Aipatu Berriako artikuluak, zinez untsa biltzen duen izpiritua, ikusiko Bernedon praktikan nola jarri ote den, eta ea auzitegiak zer ebazpen ematen duen ala ez. Epaileak esku artean duen txostena oraino ez da ikusten ahal; Bernedoko arduradunen aldetik xehetasun gehiagorik ere ez.
