Heriotze

Dominique Bidegorry 72 urtetan zendu da, eritasunak eremanik. Jon den ortziralean ziren bere ehorzketak. Doluminak anai-arreba eta familia guziari.

Arbola landatze

Baigorri ibarreko sindikatuan diren 8 herrietako ihiztariek (Urepele, Aldude, Banka, Baigorri, Irulegi, Anhauze, Azkarate, Lasa) 3 hektarea arbola landatu dituzte Urdantzian. 300 orotara, haitza, haitz amerikanoa, gerezi basa, gaztainondoa, leizarra, gaztigarra, aran basa edo sagar basa, bereziki. 25 bat lagun ari izan dira landatze lanetan, ihiztari eta laguntzaile. Donapaleuko laborantxa eskolako 10 bat ikasle gazte ere etorri dira egun batez.

Lafitte mintegiak ditu zuhaitz ondoak furnitu, 28 mila euroko fresak badira, jakin behar da zaintzeko zerko bat eman dutela arbola bakotxaren inguruan. Euskal Elkargotik diru laguntza eskuratu dute eta beste batzu espero dituzte, ihizi federazio edo Departamendutik.

Tokia "Natura 2000" gunean kokatzen da, xedea artzainekin eta ONF egiturako oihanzainekin prestatu dute.

Helburua: ihiztariek urtearen erdia mendian iragaiten dute, basurde, basahuntz, pekada edo erbi ihizin besteak beste eta ingurumenari edo bioaniztasunari biziki atxikiak izanez, badakite oihanek karbonoa irensten dutela gisa hortan airea garbituz, euri urak biltzen eta jatekoa emaiten abere basa eta kabaleri. Xori pasaia anitz baita larrazkenean, hauek zuhaitz fruitudunak ere aurkituko dituzte Urdantziako oihan berri hortan.

2014an jadanik, lan bera obratu zuten Hairako oihanean, 400 bat arbola landatuz, bi tokitan.

Ortzadarra

Pausa labur baten ondotik, Ortzadarra elkarteak bere margo tailerra berriz ideki du aste huntan. Nahi duten guzieri idekia. Hemendik goiti beraz, nahi baldin baduzue margolaritzan trebatu eta bi oren giro goxokian iragan, joan "Elissonde" etxera asteazkenez (14:30).

Dantzaldi

Alaiki elkartea antolatzaile, dantzaldia iraganen da Plaza Xokon, urtarrilaren 14an, igande arratsaldez (15.00-19.00), "Lagunak" taldeak alaiturik.