Auziperatua ere, politikari parrasta batekin batean, François Bayrou ministro ohia, bestalde Paueko auzapez dena. Diotenaz, denbora batez hautetsi batzuen laguntzaile ziren askori eginaraziz lan frango untsalaz ez zirenak heiek egitekoak. Egia erran, anitzen gustuko segurik, usaia zen hola hartua, joko hori haizu balitz bezala, eta geroztik dira gauzak kanbiatu. Dena den, joan den egunean, zazpi oren segidan atxikia izan da jujeen aitzinean, ez baita holakorik ere egun guziz gertatzen! Solas eta solas, ahantziak bezala, denen buru garbitasun handirik gabe, ez ttipirik ere batzuen iduriko! Azkenean, zigortua balitz, kasu ez lukeenez ba hor nunbait traba pisu zerbait 2027ko hauteskunde-nagusietan ez berriz hautagai agertzeko, berak ez omen baitu alabainan besterik gogoan!

Galde samina noiznahi nornahiri entzuten dena egun hauetan, zonbat gostako diren aitzineko egunetan izan den galerna ikaragarriak egin makurrak. Kontuen egiten ari dira hor gaindi. Orainokoan, xuxen ezin erran omen bainan gehienik aipu diren estimueri fidatu behar balitakeorotara 700 milioi eurorena. Anitzen arabera, asurantza sariak araberan emenda litazke heldu den urte hortan, bana beste batean.

Parisen, Emmanuel Macron lehendakariak sustatu bilkura baten karietara, dei kartsu bat luzatua izan da lasaitasun gehiago izan dadien gerla gorria duten eskualdetan. Dei hori Israelen ere guti aski bederen entzuna izan da. Hitzeman dute segurik - hitzekoak izanen ote dira? -egun guziz lau orenez ez bonbarik igortzea Gaza lurraldera. Dena ere on, erabaki hori berenaz eskasegia baldin bada ere! Gisa guziz zinez gogoetagarri dago han gaindi duten egoera, ordu litake beste biderik hartzeko lehen bai lehen eta onez onean, ez badira ere denak hortarik ari. Bainan nola susta aterabide egokiagoa?

Larunbatean iragan da beraz Jondoni Martine eguna, asko gisetara ospatzen dena, Saindu handi hori gogoan segur bainan ere besteak beste 14ko gerla izigarri hartan parte hartu zuten guziak. Denak hilak dira, azkenak ez hain aspaldi. Aurten hain xuxen, dei berezi bat zabaldua izan da, heien oroitzapena ez dela galtzera utzi behar. Dei bat heien familieri, heien ondokoeri, orokorkiago historiaz axola zerbait baduten guzieri. Gazteak besteak beste oroit daiten urte latz haietaz. Gerla nola piztu zen eta nola iragan. Nun nolako makurrak egin zituen, zinez harrigarriak. Gure herrietan ere familia gehienak hunki zituzten kalte alimaleak. Gero eraiki ziren oroitarri horiek lekuko.