LABURBILDUZ. Agorrila ohartu gabe joan da eta sartuak gira irailean. San Frantziskoko Gure Euskal Etxeak joan den ebiakoitz-igandean ospatu zuen bere urteroko Udako Besta, eta Coloradoko Euskal Etxeak larunbatean berea, Littleton herrian; gisa bera egin zuten Boiseko Euskal Museo eta Ikastolak heien Winefest elgarretaratzearekin, arnoa dastatuz pintxoekin eta euskal dantza lagun, gero kaxaka saltzeko, bildu dirua heien buxetaren sartze handi. Orain, heldu den asteburuan, Chinoko Euskal Etxearen txanda da, ebiakoitz eta igandez piknik besta, eta astelehenean euskal gosaria Centro Basco ostatuan. Bitartean, agorrilaren 22an heldu zen Bankako Menditarrak taldea Colorado eta Wyomingera, eta hor segitu dute kantuz euskal etxez etxe, Buffalon eta Rock Springs-en, eta ondoren Salt Lake City, Gardnerville eta San Frantziskon, eta aste huntan Kalifornian barrena, Fresno eta Bakersfielden, itzulia asteburuan Chinoko Piknikan bururatzeko.

'BETIRAKO'. Ber denboran Argentinatik, Tandilgo Gure Etxea EEko 'Betirako' taldekoak Euskal Herrira heldu dira iragan igandean. Lehenik Maulera, Aitzindariak Alkartea lankide, Xiberoko dantzetan trebatu, eta trukea ere eginez, Argentinako 'chacarera' dantza hemen aurkeztu eta irakatsiz. Maulen 'Herentzia bizia' dokumentalaren estreinaldi europarra egin dute; egin ere agorrilaren 23an Tandilen bertan lehenengoz eman ondotik. Tandilgo euskaldunen euskal lotura, identitate eta engaiamenduaren erakusgarri da filma, joan den urteko Euskal Aste Nazionalean grabatua. Aste huntan eta ondokoan leku gehiagotan emanen dute EHan, hala nola Bizkaian Euskal Diasporaren Astean, Arratian (Olentzeroren Lagunak-en 'Transmisioa' filma ere eskainiko du programak), dantzarien saioarekin batera, eta Donostian. 8an Euskal Diasporaren Eguneko ekitaldi ofizialean dantzatuko dute, Donibane Lohizunen, Pradales lehendakaria buru Peyuco Duhart Kultur Zentroko Tanka aretoan 18:00etan. Gipuzkoan Eibar (Arrate) oinarri dutela segituko dute, hainbat hitzorduz han-hemen, buruilaren 13an Argentinarako bidea berriz ere hartu arte.

PARISE eta EDE. Guziak ezin aipaturik, munduko beste pare bat euskal aipu: urriaren 4an 70 urte ospatuko dituen Pariseko Euskal Etxeak, bolondresak galdegin ditu heldu den larunbatean, irailaren 5ean, eraikina auzolanean garbitu, apaindu eta gauza tipi batzuk arrañatzeko. Azkenik, oroitarazi andana bat izanen direla heldu den asteburuan eta ondoko astean Euskal Diasporaren Eguna (EDE) ospatuko duten munduko euskal etxeak. Berez irailaren 8an da, baina asko izanen dira ekitaldiak aitzineko eta ondoko egunetan ospatuko dituztenak. Baina honi buruz segituko dugu solasa.