Trenak ekoizten dituen Beasaingo CAF enpresak hamabortz tranbia eginen ditu Parisko eskualderako, T13 linea orain baino urrunago helaraztea ahalbidetzeko, zehazki. Ile-de-France Mobilités erakunde publikoarekin erdietsi du 150 milioi euro segurtatuko dizkion kontratua. Gainera, ordezko piezak eta tren gehiago hornitzeko parada ere eskainiko du kontratu berriak. Tranbia hauek CAFek Bigorran duen lantegian eraikiko dituzte. Tranbia bakoitza zazpi modulu artikulatuz osatua izanen da. Unitateak 42 metro luze eta 2,65 zabalekoak izanen dira, eta 256 bidaiari garraiatzen ahalko ditu.

Joan den urtarrilean, Beasaingo enpresak bertze kontratu bat sinatu zuen Akitania Berrirako hamar tren egiteko. Konpainiaren arabera, Frantzia bere merkatu nagusietako bat bilakatu da.

Laborariek Gasteizko karrikak traktorez bete dituzte agorrilaren 27an, Eusko Jaurlaritzari EAE idorte eremu izenda dezala galdegiteko. Trebiñu eta Arabako Nekazaritza Elkarteak deitua zuen protesta, baina manifestaldiaren helburua ez zen bakarrik Arabara mugatzen, Gipuzkoak eta Bizkaiak ere pairatu baitituzte idortearen ondorioak. Mobilizazioa antolatu dutenen arabera, egoera “muturrekoa” da, eta oraino txarragoa bilakatuko da erakundeek ez badute “premiazko neurririk” hartzen.

Bero handiegiak eta euri eskasiak eragin duten egoeraren azaltzeko, datuak eman dituzte: kabala hazleen %87k Eusko Jaurlaritzako Nekazaritza Sailari adierazi diote aurten iaz baino bazka gutiago bildu dutela. Esne ekoizpenari dagokionez, berriz, behi bakoitzak 5-7 litro gutiago eman omen ditu.

Urte politiko berriko lehen Gobernu Kontseilua iragan da agorrilaren 27an, Donostiako Miramar Jauregian. Karia horretara, Imanol Pradales Eusko Jaurlaritzako lehendakariak jakinarazi du alderdi politikoekin eta eragile sozioekonomikoekin bilkurak abiatuko dituela iraileko lehen hamabostaldian, “alferrikako gatazketatik urruntzeko” xedez. Biltzar hauen aipagai nagusiak ekonomia, autogobernua eta etxebizitza izanen direla zehaztu du.

Donostian beharretan direnei janaria banatzen dien KAS elkartearen eta udaltzaingoaren arteko tirabirak ez dira oraino jabaldu. Oroitaraz dezagun agorril hastapenean Donostiako auzapezak KASi debekatu ziola karrikan baliabiderik gabe bizi diren jendeei afari solidarioak banatzea. Hala ere, debekuak debeku, zenbait jendek segitu zuten gose zirenei borondatez ogitartekoak ematen. Egitate hori ez zen Udalaren gustukoa izan, horregatik, udaltzainek hainbat borondate oneko pertsona identifikatu zituzten eta zeramaten erosketa orgatxoa miatu.

Jokamolde horri beren gaitzespena agertzeko, agorrilaren 27an ehunka lagun elkartu dira Donostiako Parte Zaharrean, Kaleko Afari Solidarioak elkarteak luzatu deiari erantzunez. KASen ustez, egoera zentzugabea da, eta gero eta zailagoa da udalaren jarrera ulertzea. “Erosketa orgatxo bat eramateak susmagarri egiten zaitu”, ohartarazi dute.

Protesta mugimendu honen bidez, identifikatuak izan diren boluntarioei elkartasuna...

Donostiako Zinemaldiaren 74. edizioa irailaren 18tik 26ra iraganen da. Euskal zinemaren presentzia 31 filmek segurtatuko dute, eta horietako 26 izanen dira osoki edo hein batean euskaraz. Jose Ramon Soroize aktoreak eskuratuko du aurtengo Zinemira saria.