Kalitate handiko kantaldia

Kanpoan denbora ederra izanagatik, Aiherrako Denen Etxeko gela zanpez bete zen joan den igande arratsaldean, Hazparneko Ezkia ikastolak antolatu kantaldiarentzat. Kantaldia manera ezin hobean iragan zen, 350 bat ikuslek preziatu baitute Agustin Alkhat eta Kamila Zubeldiak sei musikari profesionalen laguntzarekin eskaini kantaldia, “Oroit Hilçia” azken diskoaren aurkezpenaren kari. Ikastolako haurrak ez dira gutxiestekoak haiek ere 2 kantu hunkigarri eman baitituzte bi kantariekin betan.

Ezkia ikastolako buraso antolatzaileek eskertu dituzte Aiherrako Herriko Etxea kantaldiaren antolaketa errazturik, bai eta kantari eta musikariak beren laguntza estimagarria ekarririk. Kantaldia bururatzean, publikoa goxoan egon da burasoek eskaini taloen dastatzeko, bai eta artista kantariekin hitz egiteko.

Eskerrak antolatzaileeri kalitate handiko kantaldi hau eskainirik.

Hardoia gunea, herri erdian den gune xoragarria

Harrieta ondoko lehengo harrobia, herri barnean aurkitzen den gunea da, Denen Etxea edo trinketetik hurbil. Lehen zegoen harrobitik ez du deus ikustekorik, duela zonbait urte hor ziren zilo guziak tapaturik, harri metak husturik, gune guzia ordokiturik eta bernaturaturik baitago orain. Hor ikus daitezke osagarri ibilbidea, belar eremua joko kolektiboentzat, fruitu arbola baita ere arto landareak, hauek ongi babestuak direlarik, eta gune heze bat. Bertan jateko mahaiak plantatuak izan dira, eta kirol ibilbidearen ekipamenduen instalazioa ez da oraindik egina. Hots toki xoragarria aurkitzen da, herri erdian berean, nolazpait baliatzen ahal litekeena, adibidez ikusgarri batzuen antolatzeko?

Herriko Etxeak laster kanpoko batzorde bat sortu beharra du, herritarrek leku honen bilakaerari buruzko gogoetetan parte hartzeko gisan, hots gune berezi honen baliatzeari buruzko proposamenak egiteko xedearekin.

Kalebo dantza ikusgarria Hardoia gunean urriaren 31n

Hazparneko Elgar Oinka dantza taldeak sorkuntza berria aurkeztuko du urriaren 31n (19:30), Aiherra herri erdian aurkitzen den Hardoia gunean: euskal dantzaren sustraietatik abiatzen den erritu garaikidea. 13 dantzarik, Ihintza Irungaray koreografoak eta AKTs musikariak, elkarrekin sortutako obra da, energiaz, musikaz eta mugimenduz betetako bidaia. Hardoia gunean antolatuko den lehen ikusgarria da, denek deskubrituko dugun gune atseginean. Arrazoi bat gehiago ekitaldi honetan parte hartzeko!

Txartelak aitzinetik eros daitezke HelloAsso webgunean, 8€ jende helduentzat eta prezio librean 12 urtez petikoentzat. Ongi etorri deneri!

Antzuola eguna, urriaren 24an, izenak aitzinetik eman behar

Ez ahantz, urriaren 24an Antzuolan iraganen den Aiherra/Antzuola egunarentzat izenak aitzinetik eman behar direla urriaren 17a aitzin Herriko Etxera deituz 05-59-29-64-02 edo mezuz: mairie@ayherre.fr.