Film bat Bil Etxean

Urriaren 18an igandearekin, Bil Etxea gelan erakutsia izanen da "Baroudeurs du Christ" filma (16:00). Dokumental horrek erakusten ditu 5 misionest Korean, Madagaskarren, Kanbodian, Indian eta Taiwanen direnak. Ez dute bizi errexa hautatu: arrotzak diren lekuetan mintzaira berriak behar dituzte ikasi, pobreen artean bizi dira eta hauen arrangurak partekatzen dituzte. Horietan baziren misionest izan aitzin, anitz diru irabazten zutenak. Baina hautu erradikala egin dute eta hori dute partekatzen dokumental horretan. Filma bururatu eta aipatuak izanen dira “Artzain Ona” parropiak eman dituen 10 misionest, “Missions etrangères de Paris” horietakoak. Okasione ederra gure izpirituak idekitzeko mundu zabalari. Sartzea 5 eurotan izanen da eta txartelak lekuan berean erosten ahalko dira.

Hil harriak

Oroit hilerriko euskal hilarriak arraberritu, garbitu eta tindatzeko lanak abiatuak direla eta urriaren 30a arte segituko direla. Gehiago jakiteko, deitu Herriko Etxera.

Mugaz gaindiko jardunaldia

Mugaz gaindiko egunaldia heldu den ibiakoitzean (urriaren 17a) iraganen da Eugin, ibarren arteko harremana azkartzeko xedearekin. Animazio frango izanen dira egun guzian, herri kirol, trail, mus, bota luze… Baigorriar guziak besta horretara gomit dira, bistan da. Bazkarian parte hartzeko, izenak eman: 06-43-62-23-22 edo animazio@baigorry.fr. Txartelak salgai Spar Oronos saltegian. Autobusa ere bada Eugira joateko.

Erregubia

US Nafarroa Baigorriko zelaian ari zen Federal 1 txapelketaren kondu, joan den igandean, Lannemezaneko taldearen kontra eta gureak nagusitu dira 47/22. Multxoko 12 taldeetarik 5. dira sailkapenean.

Pilota

"Herriarena" eta "Maite Haran" trofeoak aste hondar huntan hasiko dira Baigorriko trinketean. Urriaren 16an (ostiralean) Andereen palantxa lehiaketa, aurten utzi gaituen "Maite Haran" pilotari zenaren omenez: Haize Oçafrain-Housset/Amestoy-Tehexa Oçafrain (19:00); Arrosagaray-Marisco/ Heguy-Nahia Oçafrain (20:00).

Urriaren 18an (igandea) esku-huska, gizonetan: Etcheverria-Larre/Larrechea-Guichandut (16:00); Ziarrusta-Orhategaray/Teillery-Luro (17:00). Finalak ondoko igande goizean, urriaren 25ean, izanen dira. Ondotik bazkaria 35 eurotan. Erreserbatzeko: 06-15-51-48-30.