Lizeoko ikasleak karrikan, ikasteko baldintza hobeak galdeginez

Urriaren 6an, asteartez, lizeoko ikasleek manifestatu dute Baionan, hezkuntzarako baliabide gehiago eta ikasteko baldintza hobeak eskatzeko. Mila bat lagun elkartu dira, ikasle, unibertsitateko ikasle, guraso eta irakasleak elkartuz. Arratsalde hondarrean, sindikatuek babestutako elkarretaratzea egin dute Herriko Etxearen aitzinean. Mobilizazioa urriaren hastapeneko lizeoen blokatzeen segidan heldu da.

“Cap Emploi” helbide berria

“Cap Emploi”-k Donzac karrikako 1. zenbakian errezibituko du publikoa urriaren 14tik goiti. Ipar Euskal Herriko taldeak desgaitasunen bat duten pertsonen laneratzea edota lanean segitzea laguntzen ditu, enplegatzaileekin harremanetan. Helbide berria kontuan hartu beharko dute hitzordua duten erabiltzaileek.

Canopia modernizatzeko proiektua eztabaidagai

Canopia hondakinak tratatzeko gunea modernizatzeko kontzertazio publikoa urriaren 27ra arte zabalik da. Bil Ta Garbiren arabera, hondakinen balorizazioa %78tik %90era igotzea, tokian ekoitzitako energia emendatzea eta kostuak kontrolatzea du xede, gunea handitu gabe. Herritarrek galderak eta oharrak helaraz ditzakete sareko erregistroan edo kontzertaziorako ezarritako tokietan.

Santespietako freskak ezagutzeko ibilaldia

“Kaxu” galeriak bisita gidatua proposatzen du urriaren 17an, larunbatez (11:00-12:30). Santespieta auzoan oinez eginen den ibilaldian, Points de Vue festibalaren karietara sortutako freskak eta tokiko artisten lanak aurkeztuko dituzte. Obren gibeleko istorioak eta artisten ibilbideak ezagutzeko aukera izanen da. Izen-ematea “Kaxu” galeriaren bidez egin behar da.