Elikagai hondakinen bilketa bereizia abiatua

Urriaren 5az geroztik, Elkargoak elikagai hondakinen atez ateko bilketa eskaintzen du Donibane Lohizuneko zenbait bizitegi kolektibotan. Hirigune historikotik kanpoko etxebizitza multzo jendetsuenak hunkiak dira. Zerbitzu bera Ziburun, Hendaian eta Urruñan ere ezartzen hasi dira. Bilketa berria ez da herritar guziei orokortua: bizitegi motaren eta kokapenaren arabera antolatua da.

Ekoizleak eta sukaldariak merkatuan elkartuko dira

“Marché complice” merkatua urriaren 18an iraganen da merkatu estalian eta haren inguruan (9:00-15:00). Collège Culinaire de France egiturak antolaturik, ekoizle, artisau eta sukaldarien arteko elkarlana ezagutaraziko du, dastaketa, erakustaldi eta solasaldien bidez. Elikagaiak ekoizten dituztenen eta platerak prestatzen dituztenen lana hurbiletik ezagutzeko aukera izanen da.

Martxa arrosa igandean

Urri arrosaren karietara, elkartasun martxa antolatua da urriaren 18an, igandez. Hitzordua 9:00etan emana da Luis XIV.aren plazan; izena HelloAsso bidez edo bertan eman daiteke. Hamar euroko parte-hartzea Minbiziaren Kontrako Ligari bideratuko zaio, eriak eta haien familiak laguntzeko eta prebentzio ekintzak sustatzeko.