Jai Alaia konpontzeko lanak prestatzen

Donibane Lohizuneko Herriko Etxeak eskaintza deialdia zabaldu du Jai Alaia konpontzeko, segurtasuna hobetzeko eta eraikina indarrean diren arauetara egokitzeko. Hamahiru asteko lanaldia aurreikusi du. Merkatua hiru zatitan banatua da eta enpresek zati baterako edo gehiagotarako aurkez dezakete beren eskaintza. Azaroaren 23an, astelehenez, bururatuko da epea.

Lafitenia hondartzaren geroaz gogoeta abiatu dute

Erromardin eta Senixen egin egokitzapenen ondotik, Lafiteniaren aldia heldu da. Itsasbazterra gibelerat doala kontuan hartuz, hondartzaren ingurua nola antolatu aztertzen hasi da Herriko Etxea. Urriaren 24rako auzotarrak, ibiltariak eta bisitariak gomitatu zituen proiektuaz arduratzen den taldearekin mintzatzera. Lekua egunero erabiltzen dutenen esperientziatik abiatu nahi du herriak, egokitzapenak zehaztu aitzin.