Bizi garestiaren kontra, hirugarren larunbatez karrikan

Urriaren 31n, hirugarren larunbatez segidan, milaka lagun bildu dira Baionan bizi garestiaren kontra. Sindikatuen arabera, 3.000 lagunek parte hartu zuten, aitzineko larunbatean 8.000 izan zirelarik. Manifestaldia lasai iragan zen, prefeturak baimendu ibilbidean. Martxa bururatzean, poliziek gas negar-eragilea erabili zuten Askatasun plaza eta Santespieta zubia husteko, eta 12 lagun atxilotu zituzten.

Bestalde, Euskal Herrian Euskaraz (EHE) mugimenduak prentsagiri batean jakinarazi duenez, 50 bat lagun elkarretaratu dira eguerditan Baionako komisaldegi aitzinean. EHEk salatu du duela hilabete bi poliziek 15 urteko ikasle bat gogor kolpatu zutela, ikaslea euskaraz mintzatu zitzaielako. Mugimenduaren arabera, bi poliziak ez dituzte oraino erruztatu. Zenbait poliziaren jarrera euskarafoboa ere salatu du, bai eta poliziek eta haien agintariek manifestatzaileen aurka darabilten bortizkeria ere.

Poliziek kolpatu dituztela diotenek pausatu salaketak lehenbailehen aztertzea eta auzitan diren poliziak erruztatzea eskatu du EHEk. Salaketa eta eskaera horiek komisaldegiko arduradunei helarazi nahi izan dizkiete elkarretaratu direnek, baina, mugimenduaren arabera, poliziak eragotzi die.

EHEk bat egin du azken egunetan karrikara atera diren ikasle eta herritarren aldarrikapenekin. Ikasleen ikasketa baldintzak hobetzea, azterketak euskaraz pasatzeko ahala bermatzea eta bizi garestiari buru ematea galdegin du.

Bortizkerien biktimek abokatu batengana jotzen ahalko dute ospitalean

Euskal Kostaldeko Ospitaleak eta Baionako Abokatuen Elkargoak hitzarmena izenpetu dute bortizkerien biktimei aholku juridikoa eskuratzeko bidea errazteko. Abokatuek permanentzia atxikiko dute ospitalean berean. Hala, artatzera heldu diren pertsonek beren eskubideez eta egin ditzaketen urratsez galdetzen ahalko dute bertan, ospitaleak jadanik eskaintzen dien laguntza mediko, psikologiko eta sozialaren osagarri.

Nafarroako erromatar aztarnak Euskal Museoan

Zer aztarna utzi dituzte erromatarrek Nafarroan? ATEA arkeologia proiektuko taldeak gai hori jorratuko du azaroaren 12an, ortzegunez, Baionako Euskal Museoan (18:00). Hitzaldia urririk da, baina aitzinetik izena eman behar da, 40 lagunendako baizik ez baita lekurik. Erreserbak 05-59-59-08-98 zenbakira deituz egin daitezke.