Goizean goiz herriko okindegian ogia erosten dugularik, badakigu okina gu baino goizago jaiki dela. Gutiagotan galdetzen diogu geure buruari zenbat kilometro egin behar izan dituen labea piztera etortzeko. Gauza bera erran genezake gure burasoak etxean artatzen dituen erizainaz, haurrak eskolan hartzen dituen laguntzaileaz edo ostatuko atea azkenik hesten duen zerbitzariaz. Herriak horien guzien beharra du. Horiek guziek, beren aldetik, non dute bizitzeko tokia?

Baionan, laugarren larunbatez segidan, bizi garestiaren kontra atera da jendea karrikara. Hego Euskal Herrian, azaroaren 11rako greba orokorrera deitu dute etxebizitza eskubidearen alde. Bi mobilizazioek badute elkar ukitzen duten puntu bat. Hilabete hastapenean alokairua ordaindu eta, zer gelditzen da hozkailua betetzeko, argindarra ordaintzeko, haurrak janzteko? Etxearen prezioak baldintzatzen du ondotik egiten ahal dugun hautu bakoitza.

Maiz entzuten da barnealdera joanez gero alokairu merkeagoa atzeman daitekeela. Baina lantokia kostaldean duenak bi aldiz egin beharko du bidea, egunean. Zenbat gelditzen zaio alokairuan irabazi duenetik, autoaren gastuak kendu ondoan? Eta zenbat denbora galtzen du bidean? Kontu horietan nekez sartzen da amatxiren etxean elkarrekin bazkaltzeko parada, edo haurra eskolatik oinez biltzeko genuen astia. Horiek ere badute beren balioa.

Etxebizitzaz mintzo garelarik, etxe baten jabe izateko ametsa aipatzen dugu usu. Anitzentzat, xedea xumeagoa da. Urte osoko alokairua atzematea, udaberria heltzean berriz kartoiak prestatzen hasi beharrik gabe. Gazte batentzat, burasoen etxetik joateko parada ukaitea, herritik urrundu gabe. Bikote bat bereizten delarik, haurrek eskola berean segitzen ahalko dutela jakitea. Halako egoeretan neurtzen da herrian bizitzeko eskubidea.

Herriko besta antolatzeko laguntzaileak behar ditugu, pilota elkartea atxikitzeko burasoak, auzoan norbait ate joka joateko prest. Baina nola galdegin jendeari herriko bizian parte hartzeko, hemen egoiteko ahalik ematen ez badiogu? Etxebizitza berri bat egiten delarik, galdegin dezagun ea herrian lan egiten duenak, bere lansariarekin, han bizitzeko ahalik ukanen duen.

Herriko Etxeek zenbat etxebizitza eginen dituzten jakinaraztearekin batera, zer preziotan alokatuko diren ere erran lezakete.

Bihar goizean okindegiko atea berriz zabalduko da. Ogia mahai gainean dugularik, oroit gaitezen labea piztu duenaz. Herrian lan egitea beharrezkoa bada, herrian bizitzea luxua ote da?