Ipar Euskal Herriko eta Aturriko Publizitatea Geldi kolektiboko 25 militantek hainbat iragarki taula itzali dituzte eta 52 afixarekin estali. Ekintza horren bitartez, Bizi!, CADE, Paysages de France eta Résistance à l'agression publicitaire elkarteek energia xahutzea salatu nahi ukan dute, publizitate argidunen debekatzea eskatzen dutela.

Argidun publizitate tauletan ezarri afixetan irakurtzen ahal zen: "Taula hau pizturik uztea zentzugabekeria da pil-pilean den krisi energetikoaren garaian" edo "RLPi: Argidun publizitatea geldi".RLP da tokiko araudi publizitatea, tokian-toki aplika daitezkeen neurriak zehazten duen dokumentua. Araua herrikoa izan daiteke edo elkargoarena, auzapezaren edo(ta) elkargoaren esku da.

Ekintza hori Baionan eta Angelun gauzatu da, neurritasun energetikorako eta publizitate (pantaila, taula, seinale) argidunaren kontrako mobilizazio egunaren barnean kokatzen zena. "Energiaren prezioen kariotzeak ofizialeak, tokiko kolektibitateak eta etxe guziak, prekariorenak barne, gogor hunkitzen ditu. Klima aldaketaren ondorioak ere gero eta agerikoak dira eta animatzen gaituzte neurtuz lehentasunetan emaitera. Testuinguru horretan, energia xahutzea oraino onartezinagoa bilakatzen da" oroitarazi du Biziko Antton Harignordoquyk.

ADEME erakundeak 2020an argitaraturiko txosten batean, 2 mÀ‚'²-ko pantaila baten kontsumoa 2.000 kWh/urtean estimatzen zuen, etxe bateko urteko kontsumoaren heina kasik (berokuntza eta ur beroa kanpo). 2019an, 55.000 publizitate-pantaila digital baziren, 2017an 40.000 zirelarik, bi urtez %40ez emendatu dira.

"Ipar Euskal Herriko herriak ere ez dira publizitate pantailen inbasioaz babestuak. Energia beharrik gabe kontsumitzen dute, gure ingurunea eta irudimena kutsatzen dute" damutzen da Publizitate Oldartzearen Kontrako Erresistentzia elkarteko Elise Ayrault.

Egin den inkesta bat ber ildotik doa, herritarren %85ak espazio publikoan ikusgai diren publizitate-pantaila digitalaren kopurua murriztearen alde agertzen da, horietan %54k debekatua izan dadin onartzen dutela.