Urte berrian logotipo berria

Urte berriarekin batera, Herriko Etxea logotipo berria erabiltzen hasi da. Bazen garaia! Azkenean kendu dute orain arte erabili den logotipo baztergarri eta iraingarria, non Urruña izena letra ttipiaz eta bazter batean azaltzen zen. Oraingo honetan Urruña eta Urrugne neurri berean agertzen dira, baina lehentasuna Urruñari emanez, hau da, herriaren jatorrizko eta egiazko izenari. Urrats ttikiek xede handiak ahalbideratzen dituzte. Biba zuek!

Bertsu saioa Xaian

Hilaren 27an, ostiralarekin, Iparraldeko bertsulari gazteen finala izanen da, Pausuko Xaia ostatuan. Bertsulari finalistak hauek izanen dira: Haira Aizpurua/Eki Mateorena, Oier Urreizti/June Aiestaran eta Izaro Bilbao/Iban Lekuona. Afariarentzat 07-69-26-56-56 deituz erreserbatu behar da.

Xaharranea Harategian euskaraz

Plaza ondoko Xaharrenea etxean Xanpol Urrutiaren harategia dugu, euskal ekoizpenak eskaintzen dituena. Kalitate handiko harategia eta gainera euskalduna, salgai dituen produktu guztiak euskaraz idatzirik eskaintzen dituena. Guk dakigula herrian bakarra. Bada tenorea, gainerako denda eta komertzioetan Xanpolen euskal bideari jarrai diezaioten. Aurkezpen txarteltxoaren gibeleko aldean ongi dio Xanpolek: Zer litzateke Euskal Herria, pilotarik gabe…. Zer litzateke Euskal Herria euskararik gabe. Biba hi, Xanpol!

Kuxkuxtu txarangaren mintegia

Hil honen 11tik 15era Kuxkuxtu txarangak mintegi berezia egin du Goizuetako baserri batean, aipatu txarangaren bideak prestatzeko eta ahalbideratzeko. Hogeita hamar lagun inguru bildu ziren. Zuen poza eta musika luzerako izan daitezela!

Kaskarotak eta Zanpantzar

Eguberri eta Urtats joan berriak ditugu, eta jadanik ihautea edo ihauteria gure artean dugu. Kaskarotak badabiltza zenbait herritan bazterrak alaitzen. Otsailaren 18an, larunbatarekin, kaskarotak izanen dira Urruñan eta 25ean larunbatarekin Zanpantzarren auzia.

Urruñarrak diskogintzan

Urruñako Maita Kultura izeneko hedapen elkarteak lau disko berri hauen zabalkundea egiten ari da: Mairü taldearen Mairü, Frikun taldearen Ezerezko, Odei Barrosoren Terapia eta Ixabe taldearen Antena Baita diskoena. Azken biak urruñarrak dira. Ea Maita-Kulturak bere propagandan erraiten diguna: Odei Barrosoren terapia. Odei raperoaren lehenengo bakarkako diskoa da Terapia eta trap eta drill erritmoa eta soinu-estetika berriarekin dator. Abesti bakoitza bakarra bada ere, osotasun beraren parte direla sentitzen da. Errimaz errima, mezuz mezu. Soinuaren kalitateak borobiltzen du kolore, ideia e - Pilotata erritmika desberdinen arteko batuketa den luze hau. Ixabe taldearen Antena Baita. Xabi eta Beñat Bizkai anaiak unibertso argiluna marrazten ahalegindu dira lan honetan, melodiak eta sortutako giroak zainduz. Han-hemenka prog eta folkrock influentziak ageri dira taldearen sorkuntzetan. Etxean grabatutako demoen ondoren nortasun handiko lan honekin datorkigu taldea. Aupa musikari urruñarrak!

Esku-huskako pilotarien finala

Otsailaren 4an, larunbatarekin, Euskal Batasunaren esku-huskako pilotarien finala izanen da Dongaitz trinketean. B mailako kadeteak (10:00), A mailako kadeteak (11:00), 3. saileko seniorrak (15:00), 2. saileko seniorrak (16:00) eta 3. saileko seniorrak (17:00).

Trinketeko pilota partidak

Iparraldeko trinketeko pilota partidetan, amateur mailan jokatu diren azken partidetan urruñarrek honako emaitzak ukan dituzte: Etxeberri/Harizmendi (Denek Bat) 40 / Bideondo/Etxegoin (Urruñarrak) 35.

Adindunendako ekitaldiak urtarrilaren 26tik 31era

Hilaren 26an, ostegunarekin: Bowling (5,5 euro) eta jatetxea (15 euro) Baionan. Mahai jokoak Posta gelan (14:30). Hilaren 20an, ostiralarekin: Yoga saioa kadira gainean, Posta gelan, prezioa: 5 euro. (10:00). Hilaren 30ean, astelehenarekin, ibilaldia Zokoa auzotik Santa Barbararen elizatxora. Distantzia: 8km, iraupena: 3 oren, Posta gelan (14:00). Hilaren 31n, asteazkenarekin, sukaldaritza saioa Posta gelan (10:00) eta Urruña Lehiaketa Posta gelan (14:15). Izena emateko eta autobusa hartzeko: 07-64-62-55-14 edo 05-59-47-95-08.