Estereotipoak aulkian gelditzen dira

Segurtasun eta delinkuentzia prebentziorako tokiko kontseiluak, kiroleko diskriminazioaren kontrako borrokan, bi egun proposatzen ditu, Emazteen Eskubideen Nazioarteko Egunaren baitan.

Aurten, kirolaren estereotipoen gaia hautatu da. Sozial praktika guziak bezala, kirol aktibitateak genero markaren menpe dira.

Horretarako martxoaren 4an (17:00) Antoine d'Abbadie entzutegian "Denak gihartsu" dokumentala ikusgai izanen da. Ondotik eztabaida proposatua da, parte hartuko dute: Danièle Irazu errugbilaria, Maritxu Housset-Chapelet pilotaria, Florian Mercader BO emazteen taldeko entrenatzailea, Christian Bibal kirol kazetaria eta Emilie Pélissier-Séverac Emazteen Eskubideetarako eta Aukera Berdintasunerako saileko Departamenduko delegatuak.

Martxoaren 8an Variétés zinegelan (20:00), "La permission" filma hedatuko da. Egiazko istorio batean oinarritua da. Afrooz Iraneko emazte futbol taldeko kapitaina da, 11 urteko lanaren ondotik, bere ametsa egia bihurtzen da, Iran Asiako Nazio Kopako finalean da. Baina partitzeko mementoan, senarrak lurraldetik ateratzea debekatzen dio. Iranen, emazte batek bidaiatzeko bere senarraren baimena ukan behar du. Afrooz-ek lortu beharko du bere senarra konbentzitzera.

Printze ttipia ikusgarria

Martxoaren 4an, Gaztelu aretoan, Tximi-Txama gazte abesbatzak aurkezturik, "Printze ttipia" musika sorkuntza emana izanen da. Bi emanaldi eskainiak izanen dira euskaraz (17:30) eta frantsesez (20:00).