Bi biltzar nagusi

Pasa den asteburuan iragan dira bi elkarteren biltzar nagusiak.

Lehena Ur Begi - Ortzirale arratsaldean Latsan iragan dena, 132 parte hartzailerekin, elkarteak gaur egun 200 bat kide kondatzen ditu. Christian Ibarboure kultur axuantak eta Xan Errotabehere lehendakariak ongi etorria egin ondoan, 10 jarduera desberdinen ordezkariek aldizka beren txostena eman dute iragan urteaz: mintzaldiak (A. Errotabehere), ateraldi kulturalak (A. Amboise), arte sorkuntzak margoekin (S. Verrichon), mutxiko eta dantza (JC. Alsumard), Plazerekin kantu taldea (F. Clavier) danborrada (J. Breuillé), ibilaldi goxoak (X. Errotabehere), mendi ibilaldiak (JC. Bulle), Ur Begi Lumak idazki tailerrak (O. Etcheverry) eta Ioga (V. Gras). Txilindron lehiaketan ere elkarteak parte hartu du. Pantxika Monteils eta Jean-Claude Bulle diruzainek aipatu dute diru egoera. Nahiz galtze batekin bukatu den urtea, ez du elkartea batere irriskuan jartzen. Txosten guziak aho batez onartuak izan dira. Ondotik aurtengo egitasmoen aldi. Kasik denek beren sektorean segitzeko gogoa agertu dute: mintzaldiak (5 izanen dira), mendi ibilaldiak (Cantal lurraldeko itzuliarekin), Ur Begi Lumak olerki lehiaketa batekin, Arte sorkuntza itzuliko da eltzegintzari eta beste guziek orain arte bezala. Zuzendaritza berritzean, 10 jalgitzeetarik 9 berriz aurkeztu dira eta sartu. Xan adiskideak jakinarazi du lehendakaritza uzten zuela, ondorioz elkarte buru berria ondoko egunetan izendatuko dute. Biltzarra bukatu da René Gourmelon miragile baten ikusgarriarekin eta adiskidantzako jan-edari batzuen inguruan.

Bigarrena Eskuz-Esku - Larunbat arratsaldean zen hunen aldi, Bilgune gelan, 120 bat parte hartzailerekin, elkarteak dituela 160 bat inguru. Bruno Carrere auzapezak eta Jean-Mixel Barnetche erretorak beren presentziaz ohoratu dute biltzarra. Edmond Etcheverry lehendakariaren ongi etorriaren ondotik, Marie-Hélène Lalanne idazkariak zabaldu du iragan urteko jardueren txostena: han eta hemen antolatu elgarretaratze apairuak, mus lehiaketa Haitzekobordan, ateraldiak bereziki Alsaziako itzulia. Beste jarduerek ere segitzen dute: gimnasi goxoak, mus eta karta jokoak eta ere petanka. Maialen Guillenteguy diruzainak diru kontu oso orekatuak agertu ditu. Jean-Pierre Arrecheak bere aldetik aurtengo egitasmoen berri eman du: elgarretaratze apairu, mus lehiaketa bat agorrilean eta bi ateraldi, bat Biarnoko Saliesera eta bestea Andaluziara. Zuzendaritza berritzean ez da aldaketarik izan, emazte berri baten sartzea baizik. Bulegoak ez du aldaketarik ukanen. Auzapezaren eta erretoraren hitzaldi laburren ondotik arratsaldea segitu da errege bixkotx jate batekin, umore onean.

Mus xapelketa

Larunbatean San Frantses kolegioak antolatu mus xapelketak arrakasta bikaina bildu du, lehian 42 talde baitziren, ez bakarrik uztariztarrak, bainan ere auzo herrietarik etorriak. Talde multzo horrekin errex ulertuko da lehiaketa askitto luze joan bada ere iraupenean, kasik gauerdi arte. Erran bezala lehiaketaren bertan egin den loteriaren eta jan edarien etekinak baliatuko dituzte kolegioko gazteen ateraldien diruztatzeko. Azkenean bi taldetan banatuak baitziren, irabazleak hauek izan dira: A taldean: Denise Riviera eta Jean-Paul Basterretche eta B taldean: Frantxua Ayçaguer eta Stéphane Deporcq. Bildu arrakastarentzat goresmenak lehenik irabazleeri, jokolari guzieri eta bereziki antolatzaileeri.