Heriotze

Michel Lamarque zendu da 74 urtetan, eritasunez. Hazpandarra sortzez, bazen urte andana Borzirieta aldean bizi zela Marianne andrearekin, kanpinaren ondoko bide puntan. Michel zenaren gorputza joan den asteazkenean eraman dute Miarritzeko erretegira eta han hurbilekoek omenezko zeremonia eskaini diote. Doluminak Marianne eta familia guziari.

Korrika

AEK-k antolatzen duen gure mintzairaren aldeko lasterketa martxoaren 14an abiatzen da Irundik eta biharamunean martxoaren 15ean, iraganen da Baigorritik (ortziralez). Aurten badugu suerte ikaragarria, ez da gau minean pasatuko aitzineko aldietan bezala, bainan eguerdi eta laurdenetan. Garazi aldetik etorririk, gure herria zeharkatu eta, Izpegi eta Baztan aldera joanen da.

"Kattaklin"

Kattalin Indart Gohonetxek aspaldi huntan zeraman "Kattaklin" garbiketa enpresa eskuz aldatzen da. Kanboko Didier Etcheverrik hartu du segida. Hunen zerbitzuaren beharretan baldin bazirezte, huna hemen loturik bi helbide. Telefona: 06-60-46-98-29. Helbide elektronikoa: bodegapilpil@hotmail.fr. Jabez kanbiaturik ere, enpresak izen bera atxikiko du: Kattaklin.

Gaita eskola

Joan den ibiakoitzean, Baigorriko gaita eskolak entzunaldi bat antolatu du musika eskolako gelan. Gaitero eta gaitero gaientzat elgar ezagutzeko eta maila nola duten ikusteko parada ona. Orotarat 28 dira, hauetarik hamar bat Baigorrikoak, gaineratekoak Amikuze, Garazi, Uztaritze, Kanbo, Itsasu... ahantzi gabe Baionako kontserbatorioan ari direnak.

Entzunalditik landa, kontzertu laburra eskaini dute herriko plaza nagusian.

Pilota

Frantses Federakuntzako xapelgoan finalerdiak jokatu dira, joan den aste hondarrean. Baginituen bi talde Zaharrer Segitik. Zoritxarrez, biek galdu dute.

Armendaritzen, artekoen mailan: Mattin Etxeverri - Jokin Videgain (Zaharrer Segi) 34/ Eneko Etxevers - Xan Bidart (Irisartarrak) 40.

Hazparnen, 1 mailan: Xabi Alcasena - Andoni Larre (Zaharrer Segi) 35/ Bixente Lafitte - Thierry Harismendi (Denek Bat) 40.