Gobernuburu gisa segidaren hartzeko izendatua izan da Gabriel Attal, ja ministro zena eta hezkuntzaz arduratzen. Kargu horretan behin ere izan den gazteena, 34 urte baizik ez alabainan!

Apetitu gaitza, biziki xorrotxa, ba omen duena, denek hala diote segurik hor gaindi. Gobernu berria muntatua eta aurkeztua izan da. Nor den ministro, horrek munta handirik ba ote du, jakinaren gainean Macron lehendakariak berak dituela denak kudeatzen bere gustura? Gauza bat harrigarria halere, nola kulturaz arduratzeko hautatua izan den Rachida Dati arrunt eskuinekoa dena, Sarkozy lehendakariaren lagun handia

Hendaian, Ziburun eta beste zonbait herritan, heldu den astean ospatuko da Jondoni Bixintxo saindua, gisa hartako egitarau kartsuarekin. Ziburun hain xuxen, lehen aldikoz hor ukanen dute Aña txotxongilo erraldoia, berenaz arras berezia, eskualde bat jende eta bestea arrain, itxura guzien arabera arrakasta gaitza behar lukeena. Bestalde, beti bezala, odolki egileen lehiaketa handia, guziz famatua! Holako guti ikusten baita! Mus lehiaketan ere jendearen parte hartze handia behar litake! Bere aldetik, Baltsan elkarteak sail goresgarria atxikiz, eta besteak beste presoen sustenguz moldatzen duen afaria! Hendaian ere hitzordu asko eta asko, toki ederra eginez danborrada delakoari, zernahi atabalari karrikaz-karrika ibilki, denak biziki harro eta alegera, usaian bezala!

Donibane Lohizuen, herriko errugbilari elkarteak, SJLO delakoak, laster bere ehun urteak beteko ditu airoski. Aste huntan, 95 urteak izanki-eta, erakusketa berezia, argazki eder frangorekin, muntatu du portuko erretegian. Oroitzapen balios frango harrotuz, guzien atsegingarri!

Hortakoak diren ikerleen arabera, urte berriaren agurtzeko ekitaldiak arras untsa joan dira, bai kostaldean, bai eta barnealde hortan. Jendea ederki mugitu da alabainan, ederki eta kartsuki, ttipi eta handi, bakoitxa bere moldean.