Domintxaindarra zen sortzez Frantxoa Cousteau. Eritasun latz batek jorik (à corps de lewy), 70 urtetan zendu da. Ofizioz kontu egilea bazen ere, bere burua euskal kulturaren aldeko militante suhar bezala ezagutarazi zuen. Antzerkilaria zen, besteak beste Hazparneko Bordaxuri taldean ari izanik. Odolean zuen antzerkia eta baditu ikastetxe giristinoetako ikasle anitz antzerkira moldatuak, antzerki irakasle gisa. Kantaria ere zen. Belardi taldean parte hartu zuen Txomin Hegi eta Maialen Estekahandirekin, Karlos Jimenez zutela musikari laguna, pianoan. Hurbiletik ezagutu dutenek badakite ere zenbat maite zuen Brassens-en kantuen xaramelatzea, errotik ezagutzen zituen, inguruko entzuleak loriaturik zaudela. Bestalde, Euskal Kultur Erakundeko diruzain ere egon zen urte askotan. Hurbildu duten guziek badakite nolako gizon lagunkina zen, umila eta leiala, gain gainetik estimatua. Azken urteak eraman ditu Etxarrin, eritasunak gaina hartu arte. Artixeko erraustegian egin diote azken agurra familiakoek, adiskideek eta Maite bizilagunak.