Heriotze

Gerezieta Haraneko Louis joan zaigu 93 urtetan.

Sortzez Izturitze Mendiburuko semea, Donapetry 8 haurridetarik seigarrena zen eta bizi zen azkena.

Gazte denboran luzaz sortetxean eta inguruko laborari etxetan lan eginik, osaba batek utzi zion Harania etxaldearen segida hartu zuen. Laborantxarekin batean, gostu gaitza zuen zuhaitz fruitudunetan, landa eta pentze inguruetan mota guzietarik bazituen landatuak. Oihanaren edertasunari eta balioari ere aspalditik ohartua zen. Hori guzia ondokoeri utzi dien ondare estimagarria. Louis xintxuketari trebea ere zen, biziki adreta. Kantari polita, euskal kantu xahar anitz bazazkien eta parropiako kantoreko kide jarraikia zen. Gizon goxoa eta fina zen, mintzatzeko atsegingarria.

Ehorzketak Gerezietako elizan iragan dira, bero sapa itogarriarekin, Blaise Martin apeza ofizio emaile eta Xalbat Berterretche musika joile, bururatzean Peio Donapetry Haranian bizi den iloba ttipiaren lekukotasun sentikorrarekin.

Doluminak ahaidekia guziari.

Arberoako ostiralak

Aurten 5. aldikoz antolatuak direnak uztailaren 3an abiatuko dira Donamartirin, ondokoa uztailaren 10ean Izturitzen beharra da Artetxea elkartea antolatzaile. Nun izanen den eta beste xehetasunak heldu den astean jakinaraziko ditugu.

Izturitzeko merkatua

Ez ahantz ostiral huntan (3an) dugula hilabeteko merkatu handia (18:00-19:30).