ELB, Lurzaindia, Cade eta Ostia mugimenduek deia zabaldua zuten joan den larunbatean Santespietako auzoan den Bouygues Immobilier promotorearen bulegora hurbiltzera. Marieneko funtsetan 94 egoitza eraikitzeko proiektuaren kontrako borrokak segitzen du, 100 bat pertsona hurbilduak ziren.

Irailean epaitegi judizialak ELB sindikatuari eta Lurzaindia elkarteari agindu du primaderan eraikia izan zen arditegia kentzea, bai eta ardiak ateratzea. Etorriak zirenek erakutsi nahi ukan dute, erabaki horren aitzinean mobilizazioak segitzen duela, proiektua ez bada gelditzen herri erresistentzia parean izanen dela aldarrikatuz.

Larunbateko mobilizazioan “Marienea ez hunki” pentzean zen zurezko panela promotorearen bulegoaren aitzinean pausatua izan da, pentzean gelditzen ziren sei ardiak ere ekarriak izan dira. Mugimendu desberdinetako ordezkariek hitza hartu dute: “Borroka juridikoa bukatua baldin bada, egoera politikoa aldatu da. Kanboko Herriko Etxea eta Euskal Elkargoko hautetsiak proiektu hunen kontra dira, Bouygues-ek kontutan hartu behar du eta proiektua abandonatu. Kanbon eraikuntza huts anitz badira, bereziki arta-etxeak zirenak, etxebizitza bihur daitezkeenak. Bouygues-ek gibel egiten ahal dezake kalterik gabe”.

Maryse Cachenaut, Lurzaindiko presidenteak zioen: “Ez gira etxebizitza ekoizpenen kontra, baina ez da laborantzarako lurrak sakrifikatuz egin behar”. Herriarteko Tokiko Planaren (PLUi) aldatzea galdegina izan da. Ekitaldia burutu da Bouygues-i idatzi gutuna irakurriz, ondotik gutunontzian pausatua izan dena.