Getxo eta Portugalete (Bizkaia) lotuko dituen ur azpiko tunelaren obrak abiatu berri dira eta inguruko bizilagunek salatu zuten joan den astean informaziorik batere jaso gabe hasi direla. Horren gaitzesteko, manifestazioa deitua zuten Getxon joan den ibiakoitzean, tunelaren egitasmoa ezeztatu eta horren eraikitzera bideratu gogo den diru-zama garraio publikorako erabil dezatela eskatzeko. Mobilizazioa bururatu eta, manifestariek kanpaldia hasi dute Artatza parkean. Manera horretan, “Subflubiala EZ” Getxoko eta Portugaleteko itsasadar azpiko tunelaren kontrako mugimenduak “erresistentziara batzeko” deia egin du. Obra horrentzat 45 milioi euroko gastua aurreikusia da eta kontrako plataformak dioenez, autoen zirkulazioa handitu baizik ez da eginen horren ondotik.

Hapoel Tel Aviv eta Maccabi Tel Aviv saskibaloi-talde israeldarrak Gasteizera jinen direla salatzeko, “Palestinarekin Elkartasuna” plataformak eta beste hainbat kolektibok agerraldi bat egin zuten joan den astean Gasteizen, Baskonia saskibaloiko taldearen saltokiaren parean. Israeldarrek azaroaren 17an eta abenduaren 4an jokatu beharko dute Baskonia taldearen kontra. Horiek horrela, beste urte batez, partida horiek ezezta daitezela eskatu du “Palestinarekin Elkartasuna” plataformak. Honen ustez hain zuzen, “Israelek historikoki kirol-ekitaldi horiek bere irudia garbitzeko eta bere krimenak normalizatzeko” erabili dituela salatu zuen “Palestinarekin Elkartasunak”. Haratago, Hapoel eta Maccabi saskibaloi taldeek harremana dute israeldar armadarekin. “Palestinarekin Elkartasuna” plataformak berretsi zuen ez duela “Israelekin inolako konplizitaterik onartuko”.

EHUk CAFekin duen lankidetza hitzarmena ez du berrituko, euskal enpresak Palestinako lurralde okupatuetan duen jokamoldeagatik. EHUko errektoretzak unibertsitateko Gobernu Kontseiluari urriaren 8an jakinarazi zion erabakia. EHUren eta Beasaingo (Gipuzkoa) multinazionalaren arteko lankidetza abenduaren 31n bukatutzat emanen dute, nazioarteko legediaren aurkakoa den Jerusalemgo tranbiaren eraikuntza dela eta.

Iruñeak Palestinako herriari eskainia zaion memoriala estreinatu berri du, Antoniutti parkean.

Oroimenerako, salaketarako eta elkartasunerako gune izanen den lekuan, Iosu Rada zizelkariaren obra ezarria izan da. Monumentu horrek Israelek Gazan egiten duen genozidioaren eta Palestinaren okupazioaren biktimak gogora ekarri nahi ditu. Bestalde, Palestinako herriaren askatasunaren eta eskubideen aldeko bat egitea berretsi nahi du ere. Zizelkaduraren oinean honela irakur daiteke: “Palestina bizirik dago. Palestinak borrokan jarrai. Palestina aske izango da”, grabaturik.

Langile bat hil zen joan den asteartean Bilboko Portuan. Bergé enpresak dituen portuko instalazioetan gertatu zen lan istripua, Bilboko Portuko Agintaritzak jakinarazi zuenez. Portuko Agintaritzak ohar batean adierazi zuenaren arabera, Bilboko portuan Bergé enpresarentzat lanean ari zen 46 urteko behargina hil zen, errota bat aldatzen ari zela, hau lehertzearekin. Sindikatuek ikerketa zorrotza eskatu dute gertatu den guzia argitzeko. Portu ingurua “arrisku handiko eremua” dela oroitarazi dute sindikatuek, bertan erabiltzen den makineria eta etengabeko garraioagatik. Haatik, “lan istripuak ez dira zoriaren edo fatalismoaren ondorio, prebenitu daitezke eta prebenitu beharko lirateke”, gaineratu dute. Aurten 62 pertsona hil dira Euskal Herrian lanean ari zirela, sindikatuen arabera, 400 jendetik hurbil azken bost urteotan.

Errigora ekimen herritarrak “Euskarari Puzka” izena duen udazkeneko kanpaina abiatu du, hiru saskiren eskaintzarekin. Azaroaren 12ra arte manaketak bilduko dituzte www.errigora.eus webgunean. Saski bakoitzaren %25a Nafarroako euskalgintzara bideratuko da. Errigora ekimenak Nafarroa hegoaldea du ardatz eta euskara ofiziala ez den zonaldean eragin nahi du, eremu horretakoak diren janariak Euskal Herri osoan ezagutaraziz, euskaratik, euskararako eta euskaraz.

Euskaraz soilik egiten den zinema festibalik zaharrena da Lekeitiokoa. Aurten, 49. urte bete ditu eta euskal zinemagintzaren talentuak, istorioak eta begiradak izan dira nagusi. Film onenaren saria, Aitor Gametxo Zabalaren Geratzen den hori lanarentzat izan da. Aitor Gametxok Urrezko Antzarra eta 3.000 euroko saria eskuratu ditu. Bere film labur dokumentalak doluaren gaia lantzen du.

Zuzendariak 2011n hil zen bere amaz dituen oroitzapenak ekartzen ditu gogora, bidaia intimoa eginez, gaur geratzen diren amaren objektu pertsonal eta oroitzapenetan murgilduz. Euskal Zine Bilerako epaileek adierazi dutenez: “Balioan jarri nahi dugu filmak doluaren esperientzia unibertsala istorio pertsonal eta kokatu batetik lantzeko duen gaitasuna, gaixotasuna bezain prozesu mingarrian edertasuna bilatuz. Muntaian eta objektuen lanketan agertzen den sentikortasuna nabarmendu nahi dugu, topiko bisualetatik eta ohiko narrazio-lekuetatik urrunduz”.

Bestalde, Euskal Zinemaren Begirada...

Matias Mujikari eman diote euskarazko literatura itzulpenaren saria, Homeroren Odisea lanaren euskaratze lanagatik (Balea Zuria), eta Jon Gerediagak Izena eta izana obragatik (Pamiela) jaso du euskarazko saiakeraren saria. Gaztelaniazko lanei dagokienez, Eli Tolaretxipiri eman diote gaztelaniazko literaturaren saria Cuerpos pasajeros poema liburuarengatik. Bestalde, Mikel Aiestaran kazetari eta idazlearen Historias de Gaza: la vida entre guerras lanari eman diote saria, gaztelaniazko saiakeraren alorrean. Mujikaren itzulpen lana “monumentala” izan da epaimahaiaren ustez: “Literatura unibertsaleko monumenturik handienetako baten itzulpen monumentala da”, adierazi du zehazki. Itzultzailearen trebetasunaz gainera, haren sormen gaitasuna ere nabarmendu du. Homeroren Odisea K.a. VIII. mendeko obra da, eta Troiako gerraren ondoren Ulisesek Itakara itzultzeko egindako bidaia kontatzen du. Mujikak euskarara ekarri du, “hitz neurtuak eta errimak baliatuz”, epaimahaiak...