Herriz Herri - Biarritz (L) | 2026ko Urriaren 29a
Halloween herrixka lorategi publikoan, Irristatze kirolen argazkiak hirian barna eta “Le Canon Français”-en aurkako mobilizazioa azaroaren 2an
Irati Esparza Guimon
Halloween herrixka lorategi publikoan
Urriaren 29tik 31ra, ostegunetik larunbatera, Halloween herrixka zabalik izanen da lorategi publikoan (14:00-23:00). “Día de los Muertos” gaiaren inguruan, apaindura, soinu eta argi jokoek giro berezia sortuko dute. Haurrendako makillaje tailerrak proposatuko dira (14:00) eta DJ batek arratsak alaituko ditu iluntzetik aitzina. Kalabazak zizelkatzeko ordubeteko tailerrak ere antolatuak dira, 6 eta 12 urte arteko haurrentzat, heldu batek lagundurik. Horietan parte hartzeko, izena eman behar da biarritz.fr webgunean; ez da lekuan berean izena ematerik izanen.
Irristatze kirolen argazkiak hirian barna
Board Culture Exposure festibalaren Off erakusketek azaroaren 9ra arte segitzen dute Miarritzen eta inguruetan. Hogei bat galeria, saltegi, kultur gune eta espazio independentek surfaren, skatearen eta snowboardaren inguruko argazkiak hartzen dituzte. Hirian barna ibiliz, kirol horiei lotutako unibertsoak eta argazkilarien begirada desberdinak ezagutzeko parada eskaintzen du ibilbideak.
“Le Canon Français”-en aurkako mobilizazioa azaroaren 2an
“Le Canon Français” taldeak azaroaren 28an Irati erakustazokan antolatu duen “Banquet basque” bazkariaren aurkako kolektiboak mobilizazio berrira deitu du. Hitzordua azaroaren 2an, astelehenez, emana da, Miarritzeko turismo bulegoaren aitzinean, ekitaldiaren ezeztatzea eskatzeko (18:00). Aurkariek salatzen dute besta eta gastronomiaren aitzakian eskuin muturreko ideiak arrunt bilakatzea. Antolatzaileek, beren aldetik, tokiko mozkinen eta elkarbizitzaren inguruko besta gisa aurkezten dute bazkaria.
Urriaren 15ean, ehun bat lagun bildu ziren Baionako suprefeturaren aitzinean. Kolektiboko ordezkaritza bat suprefetak errezibitu zuen, Ana Ezcurra Biarritz Berri taldeko hautetsiarekin batera. Aurkarien arabera, bilkurak ez zuen aitzinamendurik ekarri. Orain, Serge Blanco auzapezarekin elkartu nahi dute, haren asmoak ezagutzeko. Bazkaria mantentzen bada, azaroaren 28an Irati erakustazokaren inguruetan herritarren presentzia zabala eta erabakia prestatzen ari direla jakinarazi dute.
