Ofizioak ezagutzeko gaualdia azaroaren 5ean

Orientazio Gauaren laugarren edizioa azaroaren 5ean, ostegunez, iraganen da Baionako Merkataritza eta Industria Ganbaran (16:00-21:00). Kolegioko eta lizeoko ikasleek, ikasle unibertsitarioek, burasoek, lan bila direnek eta ofizioz aldatu nahi dutenek profesionalekin solastatzeko aukera ukanen dute. Ofizioen erakustaldiak, errealitate birtualeko esperientziak, galdera-jokoak eta ihes-jokoak proposatuko dira, lanbideak beste molde batez ezagutzeko. Sartzea urririk izanen da.

Évelyne Hérissonen “Isiltasun-lurrak” Didamen

Évelyne Hérisson artistaren “Terres de silence / Isiltasun-lurrak” erakusketa ikusgai da azaroaren 22ra arte, Didam erakustokian. Margolan eta marrazkien bidez, arkitektura, bolumenak eta giza nahiz natur motiboak uztartzen ditu artistak, denboraren joana galdekatuz. Obren parte handi bat erakusketa honetarako bereziki sortua izan da. Asteartetik igandera zabalik da (13:00-18:30). Sartzea urririk da.

Bizikletendako gune berria tren geltokian

Baionako tren geltokian bizikletendako aparkaleku eta zerbitzu gune bat, baita turismo harrera bulego bat ere, prestatzen ari da Euskal Elkargoa. Lanen egutegiak 2027ko urtarrilera arteko epea aurreikusten du. Geltokiaren ekialdeko hegalean, 40 bizikleta, bi zama-bizikleta eta hamar patinete uzteko tokiak egokituko dira. Gurpilak puzteko gunea, konponketa ttipien zerbitzua eta bateriak kargatzeko armairutxoak ere izanen dira. Proiektuaren aurrekontua 500.000 eurokoa da, Euskal Elkargoak, Mugikortasunen Sindikatuak eta Estatuak finantzatua.