Ihauteriak

Ihauterien garaian sartuak baikira, Santibate ospatu da joan den ibiakoitzean. Gazteak karrikan mozorroturik ibili dira geldialdiak eginez Trinketeko ostatuan, Irulegiko sotoan, Bixentainean eta Islan. Bigarren hitzordua martxoaren 2an dugu Libertimenduaren ikusgarriarekin.

Urdozeko bestak

Heldu den aste hondarrean ospatuko dira Manexenean.

Egitaraua: otsailaren 22an ibiakoitzean, (12:00) bazkaria piperada lukainkekin, zerrikia lursagar frijituak, sagar tarta, arnoa, kafea eta ondokoa. "Kristalak" taldea animatzaile. (20:00) zikiroa ogitartekoan. (22:00) DJ Reibax. Otsailaren 23an igandearekin, (12:00) herritarren bazkaria, (16:00) mus lehiaketa, (19:00) taloak.

Pilota

Senperen, gazteen federakuntzako finalak jokatu dira eta baginituen 3 talde Zaharrer Segi elkartetik. Ez du pare batek baizik ereman xapela.

Umetxoak: Ekain Rodriguez Haritschelar-Julen Sorhondo Iribarren (Zaharrer Segi) 24/Eñaut Dermit-Esteban Hirigoien (Noizbait) 40.

Kimuak: Pablo Inxauzpe-Jon Galan (Zaharrer Segi) 26/Andde Barberena-Ruben Bordagarai (Goizeko Izarra) 40.

Gaztetxoak: Imanol Goienetche-Mattin Monaco (Zaharrer Segi) 40/Xan Mendiondo-Julen Etchegoin (Goizeko Izarra) 34.