Santa Terexa eskola

Eskola hortako burasoek Eguberriko merkatua apailatzen dute abenduaren 7an larunbat goizez. Larunbatero eliza saihetsean iragaiten den merkatu horrek arrakasta pollita biltzen baitu, Bizar Xuri etortzekoa omen da, nahi duenarekin argazkiak egiteko. Eguberriko apainketak salduko dira ere. Arno beroa eta zitroin jusa edaten ahalko da hor berean, Ezkia plazan (8:00-12:30).

Erakusketa

Choribit gelan erakusketa/saltze bat iraganen da abenduaren 16tik 22ra. Margolaritza eta zurarekin egin artelanak ikusiko dira. Agnés Baudéant eta Serge Descobelsek dituzte hor erakutsiko diren obrak eginak: zizelkadura, joko, bitxi... hots Eguberriz opariak egiteko behar den guzia.

Mediatekan

Abenduaren 6an ostiralarekin (19:00), “La Fabrique Affamée” taldeko Nicolas Marsan eta Clément Broucke artistek “Bruno & Tonio” deitu antzerkia emanen dute:"Bruno eta Tonio lagunak dira: bat ameslaria eta bestea ele ederra. Arrats guziz zoingehiagoka batean sartzen dira bestearen desafiatzeko... Gaur akrobazia erakusketa izanen da...".

Ikusgarria 6 urtetik goiti ikus daiteke eta oren bat irauten du nunbait han. Tokiaren atxikitzeko mediatekako webgunean aurkitzen dira xehetasunak.

Ikusgarria

Iragan larunbat goizean ikuslego ederra bazen mediatekan, Euskararen urtaroaren barne emana zen “Maiteder” ikusgarriaren gozatzeko. Antzerki hau Kiribil taldeak emaiten du.

Herriko kontseiluaren bilkura

Urteko kontseiluaren azken bilkura abenduaren 5ean ostegunean (20:00) eginen da, Elgar Zentroan deneri idekia usaian bezala. Pundu anitz ikusiko dira ondoko sailetan: administrazio orokorra, finantzak, giza baliabideak, laborantza, lur funtsak, trantsizio ekologikoa, giza elkartasuna, Biharko Hiri Ttipiak proiektua eta elkarte bizitza.