Bi asteburu potolo bizi zituzten bardoztarrek! Lehenik, otsailaren 8an larunbatean, euriak eta hotzak ez zituzten beldurtu gure ihauterietako Kaskarotak, maskak eta musikariak Bardozeko etxetan zehar kantuak eta dantzak egiteko. Egun guzian, eta gauean berant arte, bardoztarrek taldea biziki ongi errezibitu zuten, matahamiak, bixkotxak, lukainkak edo edariak proposatuz.

Pasa den asteburuan berriz, bainan aldi huntan eguzkiarekin, talde horrek bukatu zuen bere itzulia larunbat goizean, Lambert eta Arbinoritz kartierretan pasatzean, aitzineko asteko giro on berarekin.

Arratsaldean, herriko plazan pertsonaia guziek desfilatu zuten, baita musikariek, zaldiek, ikastolako haurrek eta joaldunek ere.

Zanpantzar auzitegira ekarria izan zen, eta, hainbeste gaiztakeria entzutean, auzitegiaren lehendakariak haren kontrako zigor handiena ofizialki deklaratu zuen: Lo huec! Sutara! Eta dantzariek "sua ipurdian dantza" dantzatu zuten erretzen ari zen kondenatuaren inguruan.

Gero, gaualdia segitu zen kantuz Bardozen Kantuz elkartearekin, eta dantzan Punpeka taldearekin.

Foyer de Bardos elkarteak eskerrak eman nahi dizkie ateak ideki zizkieten guziei, eta hitzordua emaiten die heldu den urtean, horrelako momentu goxoak berriz partekatzeko!