Heraitzen santa Katalina

Urtero bezala ospatu da auzo horren patroin sainduaren besta. Azaroaren 22an izan da kaperan musikaldi arrakastatsua 70 bat entzulerekin. Igande goiza hasi da kaperaz arduratzen den ''Les Amis de la Chapelle'' elkartearen biltzar nagusiarekin Auzo Baita gelan, auzapez eta 25 bat lagunekin. Serge Pothier lehendakariaren txosten moral eta urteko jardueren ondotik, Jean François Ruys diruzainak oso orekatua den diru kontuen berri eman du eta zuzendaritza berritua izan da, 15 kide dituela. Txostenak oro aho batez onartuak izan dira. Kaperaren jabe Heraitzeko biztanleak dira. Duela sei urte heraiztarren, Herriko Etxearen eta parropiaren artean hitzarmen bat izenpetua izan zen kapera baliatzeko elizkizunentzat, kultur ekitaldientzat eta mantenu lanentzat. Lanak dituzte hor egiteko, teilatuan, berinate batzuetan, berogailuan (elektrikarekin arazo batzu izanik) eta elbarrituen errezebitzeko oraino hobetu behar diren horniduretan. Bainan elkartea serioski deliberatua da denetara heltzea ondoko aste eta hilabetetan. Biltzar nagusitik segituan jendea bildu da, kapera osoki betez, meza nagusiarentzat, ederki kantatu dena eta Labourdins elkarteko musikariek animatu dutena. Zintzur bustitzerik eta mutxikoen dantzatzerik gabe ez zitaiken besta hori buka. Umore onean iragan da.

Zirgabidea hetsia

Udazken huntako euriteen eta Errobiko ur altxatzeen ondorioz, zirgabidean gune batzu lehertzen ari izanez errekara, Herriko Etxeak erabaki du bide horren zati bat osoki hestea zonbait denborentzat. Mantenu obrak eginen dira ''Nive Maritime'' sindikatuarekin eta Euskal Elkargoarekin. Berriz idekitzea jakinaraziko dute behar tenorean.

Purguko auzo batzordea

Joan den astearte arratsean iragan da Gaztelondoan Erik Mailharancin axuantaren, Christelle Larrieu hautetsi erreferentearen eta Odile Etcheverry lehendakariaren inguruan 25 auzotar bildurik. Hastapenean Erikek agertu du zer eta nolakoa izanen den 2025eko aitzinkontu parte hartzailea; 2023koaren antzekoa izanen da aldaketa ttipi batzuekin. Lehenik aitzinkontuaren diru kopurua hamarretarik hamabi mila eurotara pasatzen da eta proiektuak aurkeztu ondotik bozka denbora izanen da oraikoan ekainaren lehenetik uztail erdira, Internet bidez eta ere jendeak eskaturik paper bidez ere. Iragan urtean bezala proiektuak auzo batzordeek edo elkarteek dezazkete bakarrik aurkeztu. Proiektuek behar dute izan berriak, zehatzak eta aitzinkontu batekin eginak. Pausatzeko epea joanen da otsailaren lehenetik martxo bukaerara. Iragan urtean bozetan baztertu proiektu batzu berriz aurkeztuak izaiten ahal dira. Ondotik auzo hortako bideetan egin markagailuak aipatu dira, batzuendako ongi, berte batzuentzat ez edo eskas. Nun den neurri zuzena nork egiazki juja? Bide batzuetako panel eskasak, argien hutsuneak edo berdin hondarkin biltzeko guneen hutsak azaldu dira, erantzun konkreturik gabe. Hiru eraikuntza aipu ziren ondotik: mediateka berria, 2025ean eraikuntza abiatuko baita (eztabaida zorrotz bat sortu duela), lehengo Herriko Etxe Gaztelua Euskal Elkargoaren gain pasa litaikeena eta Lota jauregia Euskal Elkargoaren gain uzteko asmatua dena berritze obren aztertzeko. Hautetsiek segurtatu dute datorren urtetik haste autobusak gehiago izanen direla, jendea gomitatzeko auto partikularrak gero eta gutiago ibiltzea herrian. Argitasun horiekin bukatu da biltzarra.

''Nun habila Perkain'' dokumentala

Arrakasta ederra bildu du Mikel Erramouspék aurkeztu ''Nun habila Perkain'' dokumentalak joan den asteazken arratsean, 90 bat ikus-entzule bilduz Lapurdi gelan. Aldude ibarreko herrien historiatik hasirik, frantses iraultza denborako gerlak ere aipatuz, aurkitu da azkenean Perkain pilotaria zenaren biziaren berri, Auritzberri, Itsasu eta bereziki Tolosako artxiboetan. Ikerketa luze eta zehatz bat Mikelek handizki ereman duena eta agertu. Ez ote du, nun ehortzia izanik ere, Perkain zenak bi itzuli egin bere hilobian hainbeste urteren buruan bere buruaz aipatzen entzunik? Publikoa loriaturik egon da. Ez da dudarik Mikel muntatzen ari den bertze hiru dokumentalek ere beharko dutela Uztaritzeko bidea hartu ondoko hilabete eta urtetan. Goresmenak Mikeli zaila izan den lan hori buruturik.

Eguberriko merkatua

Eguberriko merkatua izanen da beraz larunbat huntan (9:00-14:00) Bilgune plazan. Bisitatzen ahalko dira asko artisau sortzaileren tailer edo mahainak guti ezagutuak direnak. Parada ona ere denbora berean erosketa berezien egiteko eta jastaketa batzuen egiteko. Animazioak izanen dira haur eta helduentzat. Bizar Zuri eta Olentzero hor izan beharrak dira. Agian aro ederra ere.