Herriko besten bilana bertsutan

Trinketean ta ondotik islan, zoin goxoa zen giroa,

Igandez berriz herriko plazan, ikusgarri arraroa

Eta arratsez dantza soinua, suzko zirien tiroa,

Astelehenez eliza plazan hauxe zen egun zoroa,

Asteartean karrikakurri, ostatuetan gau eroa.

Alaitasuna izan da beti nasai bezain oparoa,

Bestak ederki pasa ditugu, ahantzirikan geroa

Eta gainera bai gure alde izan dugula aroa,

Iguzkitsua, dirdiratsua, argia bezain beroa.

Bururatzeko huna galde bat: Noiz ote zen zikiroa?

(Agian, besta komiteko gazteek ulertuko dute bertsualdi hunen azken lerroa ez dela begi kliska umoretsu bat baizik).

Erreka garbiketa

Joan den igandean egin beharra, erreka bazterren garbitzera joaiteko hitzordua igande huntara gibelatu du Iturritik elkarteak. Oroit aldi huntan Urbeltzen ariko direla eta hortarako, goizeko 10:00etan bilduko direla Aldudeko plazan. Borondate on guziak gomit dira.

Artzain xakur txapelketa

Ipar Euskal Herriko txapelketaren finala igande huntan (agorrilaren 6an) iraganen da Baigorriko kirol zelaian, feriaren ondoan. Selekzio edo hoberenen berexteak goizean eginen dira (10:00) eta zoingehiagoka nagusia arratsaldean (16:00).

Perkain

Mikel Erramuzperen dokumentala "Nun habila Perkain?" Biletxeko zine gelan ikusten ahalko dugu heldu den agorrilaren 16an ibiakoitzean (20:30). Sartzea 5 eurotan.