BOISE, IDAHO, AEB.

“Alimaleko elgarretaratze besta polita izan da, Euskal Herri osoko jendea, Estatu Batuetako euskaldunak, amerikano ez euskaldunak, Diasporako beste herrialdetako batzuk bestalari bildurik, Argentina, Kanada, Uruguai, Perutik jinak...”. “Ez dut sekula ahantziko, jendea, giroa, ber denboran Amerikan baina Euskal Herrian... nola atxikitzen duten, nola bizi eta partekatzen duten jende hauek heien gogo euskalduna, heien atxikimendua”. “Egun hauetan, sare sozialetan, Euskal Herriko bestetako hameka irudi heldu zaizkigu, eta ez da bereizten ahal zoin ziren Boiseko Jaialdikoak eta zoin Euskal Herriko herrietako bestetakoak, herri bera baita bestagile”.

“Ederra, eta handia... aurten handiena, milaka eta milaka jende, gure musikarekin, euskal moldean libertitzen, dantza, musika, janaria, bertsolariak, kantariak, populua haur, gazte eta heldu...”. “Igandean, Basque Block-en, Euskal Etxean, gure betiko moldean arizan ziren kantari, Itsasuko bat, baxenabartarrak, Maider Bedaxagar xiberotarsa... Han eta hemen sortuak, bozetan, ez duzu hitzetan kontatzen ahal barne sentipena, edertasuna, denak partzuer... antolatzaileek berek erran dutenez, komunitatea izan da protagonista, komunitatea antolatzen eta komunitatea besta egiten... Ez dea izigarria gure Diaspora?”.

Boisen hondarreko astean bildu hitzak dira. Herria, antolatzaileetarik den Rob Wrayrekin (euskaraz) mintzaturik, bakarrik ebiakoitzean Expo Idahotik (asteburuan goizeko 10etarik 17tara han ziren ekitaldiak, gero hiri barnera, “Basque Block” edo euskal auzora pasaturik), 15.000tik goiti sarrera saldu zirela adierazi dauku. “Festara” dantza eta kantuaren besta, AEB osoko talde eta gonbidatuekin. Kirol Gaua, kiroldegi arras handia jendez mukuru, herri kirolak eta aizkolariak, harri-jasotzaileak, trontzalariak, lasto-jaurtitzaileak-eta txalo zaparradapean... Eta bi eguneko “Zortziak Bat” Sinposioa BSU unibertsitatean, pilota txapelketa gizon eta emazte pilotariekin Anduiza kantxan, “Kaixo Parke”-aren estreinaldia, Real eta Athletic-eko Peñak, Euskal Zinema Eguna eta “Bizkarsoro” ematea, Mintzodromoa... Ez da aise laburbiltzea. Jende andana euskaltasuna biltzaile...