Durangoko azoka urtero ospatzen den euskal liburu eta disko azoka da. Euskaraz eta euskal munduaz zerikusia duten ekoizpenen erakusketa eta salmenta da. Azokaren helburu nagusia bertako kultur sorkuntzarentzat erakusleihoa eskaintzea da. Aurten 60. edizioa ospatuko da, abenduaren 5etik 8ra.

Aurtengo edizioa

Landako Gunean 175 partaideren artean banatu 285 erakusmahai izanen dira. Orotara, 1.026 kultur berrikuntza eskainiko dira, eta horien artean 694 liburu, 163 musika ekoizpen, 30 aldizkari eta 139 bestelako lan -fanzineak, audio-liburuak, podcastak eta abar- aurkituko dira. Horrez gain, lan berriak aurkezteko 273 ekitaldi antolatu dira.

Urteurrena kari, aurtengo edizioan bi gune berri aurkitzen ahalko dira, Berbagailua (Podcasten Plaza) eta Atartea (Arte Ederren Plaza).

Urtero bezala, egitarau aberatsa proposatuko da, besteak beste bideopodcast, liburu aurkezpen, dokumental, erakusketa, film emanaldi, kontzertu, tailer eta topaketekin.

Ipar Euskal Herritik

2006an abiatu Gerediaga elkarte antolatzailearen eta Euskal Kultur Erakundearen arteko partaidetzari esker, Ipar Euskal Herriko egituren hainbat ekoizpen deskubritzeko parada izanen da Durangoko azoka.

Euskal Kultur Erakundeak, 17 egitura edota artista-talde lagunduko ditu parte hartzen: argitaletxeak (Gatuzain, Herrima, Ikas, Maiatz, Zortziko, Euskaltzaleen Biltzarra eta Elkar), diskoetxe edo musika elkarteak (Maider, Usopop diskoak, Xutik, Maita Kultura, Elkor, Saroia eta Herri Urrats elkartea) baita bestelakoak (Seaska, Ekialdeko Estudioa eta Giltzaera).

Ipar Euskal Herriko15 artisten edo egituren lanakaurkeztuak izanen dira azokaren gune ezberdinetan, horien artean Ibawa kolektiboaren“Gaua”dantza emanaldia.

Orotara, euskarazko 60 berritasun plazaratuko dira, horietan 43 liburu, 14 disko eta 3 bestelako ekoizpen (literatura aldizkari, egutegi, bideo joko).

Informazio praktikoak

Bisitariei garraio publikoa erabiltzea gomendatzen zaie, abenduaren 6tik 8ra autobus zerbitzua plantan emanen da, Iurretako autopista irteerako parkinetatik Landakora.

Palestinak bizi duen genozidioa salatzeko, abenduaren 7an geldialdia eginen da eta elkarretaratze kulturala iraganen da Landako Plazan (14:00).

Bestalde, "Euskaraz bizitzeko, euskararen errepublika" lelopean, abenduaren 6an (13:00) manifestazio nazionala eginen da Durangon, Euskal Herrian Euskaraz-ek deiturik.

Durangoko azokaren egitaraua www.durangokoazoka.eus webgunean atzeman daiteke.