Xabat Illarregi Marzol irabazle gertatu zen joan den astean Iruñeko Nafarroa Aretoan, Nafarroako Bertsulari Txapelketan, Joanes anaiaren aitzinetik sailkaturik. Saioa Alkaiza hirugarren izan zen, Julio Soto, Eneko Lazkoz, Sarai Robles, Ekhiñe Zapiain eta Eki Mateorena segidan zituela. Bi anaiek puntuazioa gora egin zuten;Xabat Illarregik 1.205 puntu eta Joanes Illarregik 1.198,5 puntu; ondoko sailkatuek 732 puntuetatik beheiti zituztela. Oroit Saioa Alkaiza 2021ean izan zela Nafarroako txapelduna eta Julio Soto orain arteko txapelduna zela, seigarren aldikoz irabazirik 2023an. Haien aldetik, Ekhiñe Zapiain beratarrak eta Eki Mateorena leitzarrak bigarren aldia zuten Nafarroako txapelketan, aldiz lehen aldia finalean.

Agur-bertsuan, hona zer kantatu zuen Xabat Illarregik, euskara gorazarre: “Lo hartu ezkero lur honek ez du/ hizkuntzarik eramango/ ta hizkuntzarik ez duen herri/ bat ez da herri izango”.

Irene Arrarats Hernaniko zuzentzaile eta itzultzaile hernaniarra euskaltzain oso izendatua izan da joan den astean, aho batez, Euskaltzaindian. Arrarats euskaltzain urgazle zen 2018tik. Hark beteko du Andres Alberdiren hutsartea eta zortzi hilabeteren buruan sarrera-hitzaldia emanen du.

Irene Arrarats Lizeaga (Hernani, 1967) geografia eta historian lizentziatua da, Deustuko Unibertsitatean. Bere ibilbide profesionalean, euskarazko prosa landu izan du, kazetaritzako alorrean. “Euskaldunon Egunkaria”-n arizan zen 1991z geroztik 2003ra arte, estilo-zuzentzaile eta itzultzaile lehenbizi, eta euskara-arduradun gero. Ondotik, euskara-arduradun izan zen “Berria” egunkarian, eta horretan ari da gaur egun. Bestalde, Arraratsek 2007az geroztik Euskaltzaindiarekin lan egiten du hainbat batzordetan: Hiztegi Batuko lantaldean, Exonomastika batzordeanEuskaltzaindiaren Hiztegia lantaldean eta Euskara Batuaren Eskuliburuaren Batzordean.

Irene Arraratsek...

Ikasle Abertzaleak sindikatuak izena aldatu zuen joan den azaroaren 29an, Berriozarren egin zuen VIII. Kongresuan. Orain, Ikasle Antolakunde Sozialista izanen da 1988an Iruñerrian sortu Ikasle Abertzaleak ordezkatuko duena. “Hezkuntza sistema sozialistaren eta ikasle langileen askapena” lortzeko “Mugimendu Sozialistaren bide orria” segituko du Ikasle Antolakunde Sozialistak. Jon Arrondo bozeramailearen hitzetan, hezkuntzatik “iraultzari ekarpena egiten jarraitzea” da antolakunde eraberrituaren xedea. Bestalde, Ikasle Antolakunde Sozialistak euskal nazioaren goraipamena egiten du ere eta Euskal Herria dela antolakundearen jardun eremua dio, “nazio zapalkuntza bukatzea lehentasunezkoa” dela gehituz. Horretarako, bi hautu daudela uste du June Egino Ikasle Antolakunde Sozialistako eledunak: “bide erreformista” eta “bide orri sozialista iraultzailea”. Bozeramaileak bigarrena defendatu zuen Berriozaren, eta beharrezkotzat jo zuen zapalkuntza horri aurre egiteko...

Elkar diskoetxea auzira eraman du Hertzainak taldeak azken 30 urteetako kantuen irabaziak gaizki ordaintzea leporaturik. Hain zuzen, Josu Zabala, Luis Javier Saiz“Txanpi”eta Enrique Saenz “Kike” Hertzainak taldeko kideek Elkar diskoetxea salatu dute epaitegietan, taldearen eskubide digitalak kontraturik gabe kudeatu dituztela leporaturik. Gari abeslariak bere aldetik, ez du bat egin salaketarekin.

Eskubide digitalen kontzeptuaren baitan, Elkar diskoetxeak azken hiru hamarkadetan Hertzainak taldearen kantuei esker lortu irabaziak dirutza handia da. Orain, epaileak zehaztu beharko du hala den eta zenbat ote den. Lehen entzunaldia eginik, auziaren ebazpena ondoko asteetan ezagutu beharko litzateke.

Harkaitz Canoren Silueta eleberriaren osagai nagusia horixe da: sekula argitaratua izan ez den eleberri bati buruzko kritikarien lanen bilduma. Silueta 31 literatur kritikez osatua da eta Susa argitaletxearen eskutik heldu da. “Bigarren nobela barruan duen nobela da” diote idazleak eta haren editoreak eta “jolasetik” anitz du. Bestalde, Silueta eleberriak “puzzlea osatzeko lana jarriko dio irakurle bakoitzari” baina irakurleen parte-hartzea ez da puzzlea osatzera mugatzen, “liburuak duen umoreari adi izanen den irakurle bat aurresuposatzen baitu”, aurreratu zuen Leire Lopez Ziluaga editoreak Donostiako Kaxilda liburu saltokian egin aurkezpen ekitaldian.

Harkaitz Canoren azken eleberria Fakirraren ahotsa izan zen, 2018an idatzia. Artean, saiakera eta poesia argitaratu izan ditu ere.