Teleton asteburu huntan Amikuzen

"Elgarrekin gauzak higiarazten ditugu" da aurtengo Teleton-aren lema. Joan den astean, Jean Errecart lizeoan, André Larralde zuzendariak eta Gratien Lelandais-ek harrera egin ondoan, Laurence Tiennot-Herment, Teletoneko lehendakariak hitza hartu du mugimendu horren historia kondatzeko. Abenduaren 5 eta 6an eginen den kanpainan parte hartzera deitu du.

Amikuzen hitzordu anitz proposatuak dira bi egun horietan. Gehienak Donapaleun egiten badira, inguruko herri batzuek ere parte hartuko dute. Arberatze, Arboti, Etxarri eta Domintxineko haurrek etxeen itzulia eginen dute ibiakoitzean eskaintzen biltzeko, Arrutan bixkotx saltzea eginen da egun guzian. Ibilaldi eta bizikleta lasterketak proposatuak dira ibiakoitz goizean (7:30),Airetik gelatik abiatuz. Arratsaldean animazio desberdinak proposatuak dira Airetik gelan, hala nola indar joko eta dantza. Arrastirian, Amikuzeko ikastolak taloak eskainiko ditu.

Eguna bururatzeko, kantaldia proposatua da ibiakoitz arratsean (20:30), Donapaleuko zinegelan. Kriolinak eta Otxalde taldeak entzuten ahalko dira.

Euskarazko solasaldia Donapaleun

Liburuak elkarteak antolaturik, euskarazko solasaldia ibiakoitz huntan, abenduaren 6an iraganen da Donapaleuko mediatekan (10:00). Solasaldia negu hastapen huntako gaien inguruan itzulikatuko da: Eguberriko merkatua, ganer hustea, kantaldiak, antzerkiak, dantza ikusgarriak...

Joan lasaiki, deneri idekia da.

"Rural" dokumentala Donapaleun

Duela zenbait urte, Edouard Bergeonek "Au nom de la terre" filma atera zuen eta arrakasta handia ukan zuen. Aldi huntan, Jerome Baylek, Okzitaniako laborari karismatikoaren bizitzan murgiltzen gaitu. Umore eta samurtasunez, gaur egungo Frantziako familia nekazaritzaren irudi sentikorra egiten du, bai eta laborantzaren iraunarazteko borrokan ari direnena ere. "Rural" deitzen den dokumentala Donapaleuko zineman proiektatua izanen da abenduaren 15ean astelehenez (20:30). Gaualdia, Euskal Herriko Laborantza Ganbararen partaidetzarekin antolatua da. Edouard Bergeon bera hor izanen da publikoarekin solastatzeko.Filma aitzin, lekuko mozkinekin egin janari hotza eskainia izanen da (19:00).