Heldu den urteko herriko bozei begira, “Vivons Boucau – Bokale Bizi” kolektiboak bere burua aurkeztu du “desmartxa kolektibo, humano eta lurraldean errotua” gisa, eta adierazi du ekimena “hiria maite duten eta gauzak aldatzeko ordua dela” uste duten herritarrengandik sortua dela. Taldeak azpimarratu du “kolektiboaren indarrean” sinesten duela eta politika “guztion ongiaren zerbitzura jartzen denean emantzipazio-palanka” bihur daitekeela.

Ekimenaren arabera, parte-hartzea eta horizontaltasuna dira oinarrizko ardatzak: “estatus garrantzitsu bakarra hiritarrarena da”, eta kide guziek “beste edozeinen pisu bera” dutela nabarmendu dute. Horregatik, “kanpainako denboraren jabe” izatea eta herritarrekin batera programa kolektiboa lantzea erabaki dute, “HITZA HITZ” printzipioa gidari harturik.

Taldeak kezka agertu du Bokale “hemeki-hemeki lokartzen” ari dela eta “herri lotegi” bilakatzeko arriskua dagoela iritzita. Horri erantzuteko, bokaletarren beharrak eta itxaropenak jasotzeko “hiritar karabana” abiatuko dute, auzoz auzo elkarrizketarako gune dinamiko gisa. Mugimenduaren helburua da Bokalek “oldar berri bat, harrotasuna eta bizi berria” ukaitea, eta hori “bokaletarrekin eta bokaletarrentzat” eraikitzea.