Sortzea

Duela hamar bat egun, Andrea Glaise eta Gery Dupuyk ongietorria egin diote beren lehen haurñoari, muttikoa, Ioritz izendatu dutena. Goresmenak aitameri eta zorionak sortu berriari!

Alduden Elgarrekin taldearen agiria

“Aldude gure herria ttipia bainan goxoa da, elkartasuna eta bere bizi ingurumen ona bultzatzeko nahikaria duena. Gure Alduden Elgarrekin taldeak xede hauek ditu: jadanik abiatu proiektuen bururat eramaitea eta bidean direnak eta sortzekoak bultzatzea. Kalitatezko egunerokoa atxiki, lokarriak eta goxotasuna indartzea beharrezkoak dira. Herriaren bizia eta ondarea baloratzeko xedea ere agertzen da: herriko bideen eta bazterren mantentzea/inguramenaren ardura. Herriko guneak/eraikuntzak: mantendu, hobetu, egokitu. Mendi Alde eskola: aitzina joaiteko eta dinamika emaiteko baldintza onak proposatu. Garrantzitsua da ere herriari dinamika baten proposatzea/Ibarreko aktibitate ekonomikoan sartzea, Ibarreko beste herriekin lan eginez. Eraikitze proiektuak segitu behar dira eta esku eman tokian instalatze eta xerbitxu guzieri.

Nor gira? 6 emaztez eta 5 gizonez osatua da taldea. Konpetentzia desberdinak dauzka ekipa hunek, batzuen esperientzia herri baten kudeaketan, besteen ideia, gaztetasuna eta dinamika berri batekin elkartuz. Denak eguneroko Aldudeko bizian inplikatzen gira sare desberdinetan: ekonomia, kultura, kirol, elkarte desberdin… Denen engaiamendu proiektua da: herriaren zerbitzuko izaitea, konfiantza eta idekidura izpiritu batekin eta herritarren parte hartzearekin”.

Alduden Elgarrekin taldea