Iparra-Hegoa aste hondarrean

Martxoaren 9tik 15era ospatzen ari dira Seguran, Iparra-Hegoaren aurtengo edizioa. Aste hondarrean, honako egitarau aberatsa izanen da: martxoaren 12an, ostegunez (19:30) bertso eta kantu poteoa Kuxkuxtu txarangarekin, (21:30) bertso-kantu afaria Kuxkuxturekin. Martxoaren 13an, ostiralez (11:00) haur jolasak, (17:00) Etxepare lizeoko ikasleei harrera, (19:30) bildotsa burruntzian eta sagarno dastaketa, (23:00) erromeria Kiki Bordatxorekin. Horren ondotik, DJ Bull. Martxoaren 14an, larunbatez (10:00) sukalki lehiaketa, (11:00) Baigorriko gaiteroak eta Goierriko Zanpantzarra karrikaz karrika, (12:00) Etxepare lizeokoen ikusgarri ibiltaria, (13:00) gereziondoko ekitaldi nagusia, (15:00) gazte bazkaria frontoi zaharrean, (15:00) herri bazkaria xapito azpian, Kuxkuxtu txarangarekin, (18:00) Iparraldeko ikasleek azterketak euskaraz egiteko duten eskubidearen aldeko manifestazioa, (19:00) taloak eta garagarno dastaketa, (23:00) kontzertua Balantza taldearekin. Horren ondotik, eta bukatzeko, DJ Bullen musikaldia.

Bazkari-afariak Iparra-Hegoan

Hauek dira Iparra-Hegoak aurtengo ekitaldirako prestatu dituen bazkari-afariak: bertso eta kantu afaria martxoaren 12an, ostegunez, Kuxkuxtu txarangak animaturik. Bertsolariak: Eneko Araiztegi, Nerea Elustondo eta Amets Arzalluz. Plazako xapitoan (21:00). Prezioa: 26 euro, 22 euro langabetuentzat.

Herri bazkaria plazako xapitoan, martxoaren 14an, larunbatez, eta Kuxkuxtu txarangak animaturik (15:00). Prezioa: 26 euro, 22 euro langabetuentzat.

Gazte bazkaria frontoi zaharrean, martxoaren 14an, larunbatez (15:00). Prezioa: 15 euro.

Lapurdiko ihauteria herriko eskolan

Martxoaren 13an, ostiralez, eta hiri erdiko eskola publikoak antolaturik, Lapurdiko ihauteria ospatuko dute. Haurrak mozorroturik eskolatik abiatuko dira (18:00) eta karrikaz karrika ibiliko dira. Pilota-plazan euskal dantzak eskainiko dituzte (18:30). Jan-edariak ere salgai izanen dira.

Korrikaren bizkarrekoak salgai

Aurten, Korrikaren 24. edizioa izanen da eta haren aldarria: “Euskara gara”.Martxoaren 19an Atharratzetik abiatuko da eta 29an Bilbon bukatuko. Martxoaren 25ean (3:49), Urruñara sartuko da Azkainetik eta Oletatik etorririk. Bizkarrekoak jadanik salgai dira 6 euroren truke eta Xaian erosten ahal dira.

Herriko bozak

Martxoaren 15ean eta 22an izanen diren herri bozei begira, zerrendak agertzen hasiak dira. Lehengoan, Filipe Aramendi jaun auzapezaren zerrendaren berri eman genuen. Propagandazko liburuxka eta ekitaldi guziak euskaraz eta frantsesez, erdi eta erdi. Zoriontzeko modukoa, zinez! Oraingoan, Sébastien Etxebarneren zerrenda aurkeztu dute, eta propagandazko liburuxka banatu. Zoritxarrez, hemen ezin dugu gauza bera erran, den-dena frantsesez baitago, euskarari eman dizkioten aipamen folkloriko-sinboliko labur batzuk kenduta. Abiapuntu txarra. Honako bilkura publikoak antolatu dituzte: martxoaren 2an Berruetako Lepo Bidean gelan egin zuten, martxoaren 4an Oletako eskolan, martxoaren 6an Posta gelan, martxoaren 9an Pausuko Intzuralde gelan, martxoaren 11n Jeanne Senper gelan, eta azkena, martxoaren 13an, ostiralez, Zokoa auzoko aisialdi gelan eginen dute (19:00).

Bixikeneko errugbi txapelketa

Martxoaren 14an, larunbatez, izanen da errugbi txapelketa Bixikenean (14:00). Jokalari taldeak 5 eta 8 pertsona artekoak izan beharko dira.

Pala txapelketa Pausun

Jadanik hasia da, Bidasoan Euskaraz kultur ekimenaren barruan, urtero, eta hiru mailetan, Bakalau elkarteak antolatzen duen pala txapelketa, eta maiatzaren 3an jokatuko dute finala. Osora 32 bikotek, hau da, 64 pilotarik hartzen dute parte.