Asteburu aberatsa!

Libertimendua larunbatean: goizik hasiko da Xuriatean arrautze eta xingarra janez, (10:00) desfilea, (11:00) emanaldia eta ondotik jateko eta edateko Ttattola gaztetxean.

Hauteskundeak

Hauek igandean iraganen dira. Jadanik erran bezala bi zerrenda aurkezten dira:

“Hazparne bihotzean” Isabelle Pargade oraiko auzapezak eramana. Hunek bere azken bilkura publikoa herri erdian eginen du martxoaren 13an ostiralez (20:00) Mahain Joko gelan.

“Herritarrekin” Mikel Ospitalek eraman zerrenda abertzale eta anitza. Azken bilkura idekia martxoaren 12an ostegunez eginen du Emile Lavigne gelan.

Bietan parte hartzea gomendatua da!

Antzerkia

Martxoaren 13an arrastirian (19:30) Mediatekan, Le thêatre du Versant taldeak “Même les oiseaux ne peuvent pas toujours planer” antzerkia emanen du. Antzerki hau Fleur Rabasek idatzia du Liliane Atlanen testu batzu erabiliz.

“Hiru emazte ospitale psikiatriko batean: kontzentrazio kanpoetan egonak dira... Eroak eta gezurtiak direla erraiten da. Bizkitartean tindua, marrazkia, solasa eta dantzari esker irri egiten dute, elgar lagunduz beti. Erraldi sarkorrek eta poesiak, biziaz gose diren emazte horien borrokan sarrarazten du publikoa.”

Sartzea urririk da. Antzerkia hamabi urtez goiti dituztenei zuzendua da eta oren bat irauten du.

Kontzertu barrokoa

Martxoaren 14an larunbatean (20:00) Kaperan, Aéolia koruak kontzertua eskainiko du. Taldea Emmanuelle Lamarque andereak zuzentzen du. Emanaldia anitza da eta barrokoaren jastatzera ausartu behar dela diote. Kitorik da 15 urtez petik dituztenentzat.

Korrika

Ondoko asteburuan iraganen da hau, 24. aldikoz. Atharratzen abiatu eta, Hazparnen sartuko da (10:30) Lekuineko bidetik. Navarre, Francis Jammes, Jean Lissar eta Jats karriketan pasatuz Zelairat joanen da, Lekornera buruz joaiteko gero.

Korrikaren goaitatzeko gaualdi berezia antolatu dute Xuriatea ostatuan (18:00). Gaualdi alaitua izanen da jateko eta edateko moldearekin.