Muslariek galdu

Frantziako mus txapelketaren finalen egun handia Irisarrin iragan zen, Pazko astelehenez, eta gure xokoa ordezkatzen zuten 3 ekipen artean, bat Aiherrakoa zen Xarlo Haristoy eta J-Noël Minjouk osatua. Hauek final-hamaseirenetan galdu dute Baigorriko Paul Dupuy eta Pantzo Hirigarairen kontra. Halere, 52 pareen artean hamazazpigarren bururatu dute txapelketa nagusia, eta ez dira eskuak hutsik etxera sartu. Goresmenak hein hortara heldurik, beste aldian urrunago joanen zirezte!

Larunbatean kantaldi eta paella

Joan den astean deia aipaturik, ez ahantz eskola libroak antolatzen duen gaualdi berezia larunbat arrastirian dugula, apirilaren 18an (19:30), Aiherrako Elizan.

Lehen partean Hazparne aldeko Ahots taldea (30 emazte kantari) entzuten ahalko da, eta ondotik burasoek prestatu etxera eramaiteko paella erosten ahalko da. Zati bakoitzaren prezioa 12 eurotan finkatua da, haatik hobe aitzinetik erreserbatzea 06-68-56-69-33ra deituz. Kantaldiarentzat, sartzea prezio librean izanen da. Ongi etorri deneri!

Konpostelako bidexka Aiherran gaindi

Konpostelako bideetan gaindi ibiltzen diren herritarrak bat baino gehiago baitira, pentsatzekoa da argibide hunek interesatuko dituela.

Joan den astean ohartu gira Bastida eta Aiherra artean Bastidako sagarnotegi ohitik Aiherra Etxexuriarateko bidexkan, eskuin aldean Konpostelako bidea seinalatzen duten pegatinak berriki pausatuak izan zirela. Aiherra gainera segitzen du bidexkak, elizatik pasatuz, Beltzagitea ondotik, Lekuinera buruz (hau bide gudronatua), eta gero Gerezietatik, Atisenetik, Heletatik eta Irisarrin barna Donibane Garazira. Manera guzien arabera, berriki seinalatua izan den bidexka hau Donibane Garazira heltzeko aldaera (variante) bat baizik ez da, Ahurti edo Belokeko komentutik abiatzen dena.