“Menta” liburu saltegia Donapaleuko merkatuan

Menta liburu saltegia Ortzaizen eraikia izan da 2021ean. Geroztik irakurleen bilgune baliosa bilakatu da Charlotte Rousseauren gidaritzapean. Zerbitzu hori eskaini nahi du ondoko lurraldeeri kamioneta batean ibiliz herriz herri hala nola Larzabalen, Baigorrin, Bankan, Urepelen, Heletan, Itsasun eta Donapaleun.

Amikuzeko irakurleek Donapaleuko merkatuan aurkitzen ahalko dute hilabeteko 3. ostiraletan. Egiazko liburu-denda mugikorra da, salgai diren liburuen hautu garrantzitsua proposatzen duena: eleberriak eta dokumentalak, komikiak eta liburu ederrak, gazte literatura eta euskarazko funts garrantzitsua. Ondoko hitzordua ostiral huntan, apirilaren 17an, Donapaleuko merkatuan finkatua da.

Huts egin behar ez den hitzordua, irakurketa denendako egina dela azpimarratzeko. Oroitarazi behar da hortaz gain, irakurleek beste bi liburu-denda badituztela Donapaleun (Bertso Amikuze eta Maison de la presse) baita mediateka bat ere.

Donapaleu, “Herri Txiki Infernu Handi” Euskal Telebistan

Amendüze-Unasoko emankizuna ikusi dutenek, irri eta emozione artean, plazer hartu dute herri hortako artistak ikusirik EITBko pantailan. Aldi huntan, Donapaleukoen aldi izanen da. Grabaketa lanak martxoan egin dituzte.

Emankizuna, igande huntan, apirilaren 19an, pasako da Euskal Telebistan (22:00). Memento goxo baten pasatzeko parada, dudarik gabe!