Uztailaren 1ean, Errobiko festibalari buruzko prentsaurrekoa iragan da, festibalaren 30. urteurrenaren berri emateko. Aurtengo edizioa uztailaren 22tik 26ra iraganen da, Itsasun. Prentsaurrekoan, Julen eta Beñat Achiary, Mizel Hiribarren Itsasuko auzapeza, Bixente Etxegarai (Ehundu) eta Ibawa kolektiboko kideak izan ziren.

30 urteko ibilbidea

1996az geroztik, Errobiko Festibalak uztailero Euskal Herriko baita munduko hainbat tokitatik etorritako artistak biltzen ditu, diziplina anitzetan ari diren sortzaileak elkartuz. Musika, dantza, kantuak, atabalak, elkarrizketak, poesia eta arte plastikoak elkartzen dira bertan. Esperantza eta erresistentziaren erritmoek gidaturiko polifonia artistikoa da, etengabe berritzen eta berrasmatzen jakin duen sorkuntza kolektiboa.

Errobiko Festibalak 30. urteurrena ospatuko du aurten, hiru hamarkadatan kultura, hizkuntza eta herrien arteko topagune izateko egin duen bidea azpimarratuz. Antolatzaileen arabera, festibala ez da ikusgarri-programazio hutsa, baizik eta sorkuntza, gogoeta eta harremanak sustatzeko espazio idekia.

Aurtengo edizioak Euskal Herriko eta munduko hainbat tradizio eta adierazpen artistiko elkartuko ditu, bereziki kultura kreolekin eta beste herri batzuetako musika eta ahotsekin loturak indartuz. Egitarauaren bidez, aniztasuna, hizkuntza gutituen bizitasuna eta kultur arteko elkarrizketa izanen dira ardatz nagusiak.

30. edizioak, festibalaren historian garrantzitsuak izan diren hainbat pertsona omenduko ditu, besteak beste Maite Achiary-Etchemendy eta Pedro Soler.

Egitarauan

Gomita ugariren presentziarekin ospatuko da festibala. Horietan, Ibawa kolektiboak eta Ehunduk parte hartuko dute. Ibawak dantza garaikidea egiten du, eta “Gaua” bere ikusgarriaren aitzin-estreinaldia eginen du Atharri aretoan, uztailaren 23an (21:30). Ikusezin bilakarazi, debekatu eta plaza publikoan dantzatzeagatik zigortu nahi izan zituzten euskal emazteen arrastoan, gaur egungo gorputzak oihartzunarazten dituzte.

Ehundu berriz, Errobiko Festibalaren ahots kolektiboa da. Arratseko kontzertuen hastapenean, Ehunduk ongietorri-kantu bat emanen du, publikoa eta artistak elkartuz.

Euskal kantu-tradizioan eta munduko polifonietan inspiraturik, ahotsak elkartu eta polifonia berri bat sortzea du helburu. Ez da ohiko abesbatza, baizik eta sorkuntza eta esperimentaziorako kolektiboa.

Egitarau zehatza errobikofestibala.net webgunean aurki daiteke.