Ziburu hartu liburu

Uztailaren 10ean (10:00-13:00), heroi arruntei eskainiriko goiza izanen da. Liburutegi ibiltaria Zubiburu auzotegian jarriko da, irakurketa, jokoa eta tokiko oroimenaren inguruko une goxorako. Gure urratsak haien urratsetan eta Ziburuko oroitzapenak eta gogoetak erakusketan ikusgai.

Odol ematea

Uztailaren 10ean (15:00-19:00), Guy Poulou erabilera anitzeko gelan odola ematen ahalko da, hitzordua aitzinetik dondesang.efs.sante.fr webgunean emanez.

Filma

Uztailaren 17an, “Irati” filma ikusteko parada izanen da herriko plazan, ilunduko duenean. Huna sinopsia: “VIII. mendean, Karlomagnoren armada Pirinioak sarraskitzen ari da, eta, hari aurre egiteko, ibarjaunak laguntza eske jotzen du bertako jainko zaharrengana, zeinak desagertzeko zorian baitaude kristautasunaren eraginez. Odolezko itun baten bitartez, ibarjauna baskoi paganoak etsaia garaitzen du, trukean bizia emanda, baina lehenago, Eneko semeari hitzemanarazten dio ibarjaun zuzena izanen dela.

Urte batzuk beranduago, Eneko, jadaneko heldua eta kristau fedean hezia, haur denboran egindako promesa betetzera doa. Eta horretarako ezinbestekoa ukanen du ibarreko gazte baten laguntza, Irati izeneko pagano batena. Eneko noble gaztea Pirinioetako baso horietan murgilduko da, aitaren gorpuaren bila eta Iratiren laguntzarekin mundu mitologiko ilun bat ezagutuko du”.

Oharra: eszena batzuk gogorrak izan daitezke publiko gaztearentzat.