BAB bulebarreko bidegorria ireki da

Bizikletentzako 1,5 kilometroko lehen zatia erabilgarri da, Pontrits karrikatik Bahinos biribilguneraino. Autoen bidetik bereizia den bi noranzkoko bideak lehendik zeuden bizikleta bideekin lotura egiten du. Obrak azaroan berriz hasiko dira: 2,5 kilometroko ibilbide osoa 2027ko martxorako bururatzea aurreikusia da.

Auzo kontseiluetan parte hartzeko deia

Herriko Etxeak hautagaitzak biltzen ditu 2026-2029 aldiko auzo kontseiluak osatzeko. Hamasei urtetik goitiko angeluarrek izena eman dezakete. Auzo bakoitzean, hamabi herritar boluntario zozketaz hautatuko dituzte, parekotasuna errespetatuz. Urtean lau bilkura eginen dituzte, eguneroko biziari eta auzoen hobekuntzari buruz eztabaidatzeko.

Bihotz itxurako kuxinak elkartasunez

Urri Arrosa kanpainaren karietara, Anglet Accueille elkarteko jostunek bihotz itxurako kuxinak prestatzen dituzte, bularreko minbiziaren ebakuntza izan duten emazteentzat. Besapean ezartzeko pentsatuak diren kuxinak Euskal Kostaldeko Ospitaleari eta Belharra klinikari emanen dizkiete. Ekimenak boluntarioen joskintza zaletasuna eta gaixoei laguntzeko nahia elkartzen ditu.