“Espekulazioaren kontra eta etxebizitza eskubide bermatuaren alde” manifestaldiak izan ziren joan den larunbatean Bilbon, Donostian, Gasteizen eta Iruñean. Anartean, Bilboko Arriaga antzokiaren aitzinean kanpaldia egiten ari dira hainbat jendek etxebizitzaren egoera salatzeko eta etxe duinen alde. Joan den astelehenean hasi zuten, 30 bat kanpin denda dira. Kanpaldiko ordezkariek uste dute etxebizitzaren aldeko mugimenduak aitzina segitu behar duela, “etxebizitzaren negozioari esker aberasten diren putre funtsei, bankuei, etxe agentziei eta etxejabeei” buru egiteko. Negozio horren “konplize” deitu diete Espainiako Gobernuari eta Eusko Jaurlaritzari. Etxebizitza eskubideen aldeko Bilboko kanpalekuko ordezkariek Madrilekoek egin greba orokorrerako deia babesten dutela jakinarazi dute.

Errenteriako Herriko Etxeak eta Ametsak Sortzen Cohousing elkarteak etxebizitza kooperatiboaren sortzeko prozesu berritzailea martxan ezarriko dute. Lehen aldia da Araba, Bizkaia, eta Gipuzkoako Herriko Etxe batek lur publikoa uzten duela etxebizitza kooperatibo proiektu bat bultzatzeko. Helburu bikoitza du Errenteriako Herriko Etxeak eta Ametsak Sortzen Cohousing elkarteak abiatuko duten prozesuak: batetik, etxebizitza kooperatiboaren ereduaren ezagutaraztea eta bestetik, Errenteria-Oreretan halako proiektu bat martxan jartzeko aukerak badiren neurtzea.

Joan den astelehenean Babacar Welle senegaldar gizona hil zuen Hondarribiko herriko polizia batek. Horrek berehalako erreakzioa eragin zuen Bidasoa eskualdeko senegaldarren artean. Ondorioz, Mankosengal elkarteak mobilizazioak deitu zituen poliziaren esku-hartzearen gaitzesteko. Awa Zeck Mankosengal kolektiboko presidenteak justizia eskatu zuen, eta Babacar Wellerekin erabili poliziaren indarra arrazoizko edozein muga gainditu zuela adierazi zuen. Bertsio ofizialaren arabera, Hondarribiko herriko poliziako agente batek 46 urteko bizilaguna hil zuen, arma zuri batekin Ertzaintzako agente bati eraso egiten saiatzen ari zelarik.

Gertakariaren eraginez, Mamadou Moustapha Loum Senegalgo Errepublikako kontsul nagusiak ere parte hartu du, eta Gipuzkoako udalerrira joan. Ordezkaritza diplomatikoa Igor Enparan Hondarribiko alkatearekin bildu da, Welle hil ondoren sortu den egoerari buruz mintzatzeko. Auzapezak doluminak eman zizkien hildakoaren senideei eta erakundeei eta herritarrei...

Global Sumud Flotillako kideek maiatzaren 23an Loiuko aireportuan lur hartu zutenean Ertzaintzak egin zituen kargengatik Eusko Jaurlaritzako Segurtasun sailburu Bingen Zupiriaren aurkako kereila gibelera bota dutela-eta, kexu agertu dira flotillako kideen abokatuak. “Salagarria da ardura gabe uztea, berak publikoki aitortu zuelako poliziaren erasoaren ardura beregain hartzen zuela”. EAEko Justizia Auzitegi Nagusiaren iritziz, “ez dago inola ere kereilak lekartzakeen deliturik” Bingen Zupiriaren jokamoldean. Erabakia ez da irmoa, eta flotillako ordezkariek helegiteko parada dute. Haien aldetik, Global Sumud Flotillako kideek haien kontra eman zen eraso bortitza salatzen, gertatutakoa iker dadin eskatzen eta erantzukizunak har daitezen eskatzen jarraituko dutela adierazi dute haien abokatuek. “Ertzaintzaren basakeria mundu osoak ikusi zuen, irudiak argiak dira”, diote, “genozidio bat salatzea eskubide zibil eta politiko bat delako aurrera jarraituko...

Loiuko aireportuari Agirre Lehendakaria izena ezartzeko eskaera onartu zuen Eusko Legebiltzarrak joan den ostegunean. EAJk, PSE-EEk eta EH Bilduk babestu zuten proposamena. Alderdi Popularra eta Sumar alderdiak aldiz, abstenitu ziren. Horiek horrela, Aena egiturak – Espainiako aireportuen trafikoa zuzentzen duen instituzioak – du azken hitza. EH Bildu alderdiko eledunak nabarmendu zuen aireportuek islatzen dituztela herrialde baten sartzea eta ateratzea. Hau da, heldu denari “nondik gatozen kontatzeko, baina baita hemen bizi garenoi zer izan nahi dugun galdetzeko ere” balio dutela. Eta gogora ekarri zuen munduan edota Euskal Herritik hurbil ere badirela adibideak. Adibidez, Konpostelako aireportua Rosalía de Castro (1837-1885) deitzen da, XIX. mendeko olerkari ospetsuaren omenez. Eta Bartzelonako aireportuak Josep Tarradellas (1899-1988) du izena, Kataluniako politikari ospetsua izanaren oroimenez.

Iruñeko Euskalerria Irratiak egoitza berria du orain. 300 metro karratuko egonleku nasaia da, estudio-espazio zabalak dituena. Mahai erraldoia du gonbidatu eta kazetarientzat; musika taldeak edo beste ikuskizunak zuzenean hartzeko espazioa eta 40 bat lagunek irratia zuzenean jarraitzeko aski handi den espazioa, guztia sei kamera digitalez lagundurik. Euskalerria Irratia sei kazetaritik bederatzira pasatu da eta irratiaren igortze eremua zabaldu du, bai eta lan eremua ere bai: Estellerrian, Tafallerrian, Zangozaldean eta Erriberan kolaboratzaile sarea antolatzen ari dira Errigoraren laguntzarekin. Eremu horietatik hainbat kolaboratzailek emisio bereziak egingo dituzte. Euskalerria Irratiak 200 kolaboratzailetik gora ditu, guziak doan aritzen dira lanean, eta lehenbiziz, eskualde horietako kolaboratzaileak ordainduko dituzte. Bestalde, 900 bazkide ditu irratiak eta kanpaina berezia eginen du beste 400 gehiagoren lortzeko. Hauteskundeen ondotik “garai gogorrak” etor daitezkeela...