Azaroaren 22an, Jean-René Etchegaray Euskal Elkargoko lehendakariak, Martine Bisauta trantsizio ekologiko eta energetikoaren ardura duen lehendakariordeak eta Roland Hirigoyen bizitegien ardura duen lehendakariordeak, Baionan Bizitegien eta Energiaren Etxea estreinatu dute. Hélène Malatrey Baionako Suprefeturako idazkari nagusia eta Andde Saint-Marie Akitania Berria eskualdeko kontseilari delegatua ere presente ziren.

Funtzioa

Bizitegien eta Energiaren Etxea leku berritzailea eta hautetsientzat lehentasunezkoa da. Biztanleei urririk informatzea eta beren bizilekua berritzeko desmartxak egitea ahalbidetzen die. Jean-René Etchegarayk zioen: "Gure herrikideek etxebizitzaren krisia pairatzen dute eta hau krisi klimatiko, ekonomiko eta sozialaren bihotzean kokatzen da. Zerbitzu publiko honek bizitza errexten die eta fakturen murriztea ere ahalbidetzen du".

Etxebizitza eta lan erabilpena duten eraikinek Ipar Euskal Herriko berotegi efektuko gas isurien %15a eragiten dute. Eraikinen energia-berrikuntza, Klima Planak 2030erako isuriak %20z eta 2050erako %73z murrizteko duen anbizioaren parte da.

Laguntzak

Bizitegien eta Energiaren Etxeak, Etxebizitzari buruzko Departamenduko Informazio Agentzia (ADIL 64), Arkitektura Hirigintza Ingurumen Kontseilua (CAUE 64) eta France Services sarearekin lan egiten du.

Kontseilariek lehen hausnarketan laguntzen dute, hau da energia berrikuntza lanak burutzeko, etxebizitza baldintza onetan ahal bezain luzaz bizitzeko gisan berritzeko, egoitza alokairuan eman eta eskura diren diru laguntzak ezagutzeko. Kontseilariek, biztanleak administrazio, teknika eta zuzenbide mailako kontseiluak eman eta labeldun profesionalengana bideratzen dituzte, eskura diren laguntza mota desberdinen artean gidatuz. Dispositibo desberdinak eskuragarri dira eta proiektuak ikertuak dira biztanleek beren berritze xedea burutzeko eskura ditzaketen finantza baliabide guziak atzemateko gisan.

Diru baliabideak

Euskal Elkargoko hautetsiek 400.500 euroko aurrekontua bozkatu dute Bizitegien eta Energiaren Etxearen funtzionamendua segurtatzeko. Akitania Berria eskualde kontseiluak 280.000 eurorainoko diru laguntza ekartzen ahalko lioke aurrekontuari.

Horrez gain, Euskal Elkargoak zuzeneko diru laguntza dispositiboa proposatzen du, urtean 2 milioi eurorekin, etxekoek beren bizitegiaren berritze energetikoa edo bestelako berritze lanak burutzeko gisan.